ԿԵՍԴԱՐՅԱ ՀՈԲԵԼՅԱՆ Ստեփան ՊԱՊԻԿՅԱՆ, Հայկական էներգետիկական ակադեմիայի հիմնադիր նախագահ, տեխնիկական գիտությունների թեկնածու Որոտանի հիդրոէլեկտրակայանների համակարգը բաղկացած է երեք ենթակայաններից, որոնք տեղաբաշխված են Որոտան գետի վրա: Հիդրոէլեկտրակայանների համակարգը կազմված է երեք աստիճանից: Գումարային տեղակայված էլեկտրական հզորությունը կազմում է 404.2 ՄՎտ, տարեկան միջին նախագծային արտադրանքըՙ 1.16 միլիարդ կՎտժ: 1970 թ. գործարկվել է համակարգի առաջնեկըՙ Տաթեւ ՀԷԿ-ը, 1978թ-ինՙ Շամբը, իսկ 1989 թ-ինՙ Սպանդարյան ՀԷԿ-ը: Տաթեւ ՀԷԿ-ը համակարգի առաջնեկն է: Ճնշումային առումով կայանը առաջինն էր նաեւ նախկին ԽՍՀՄ-ում: Կայանի հիմնական կառույցներն ենՙ գլխամասային հանգույց, դերիվացիոն թունել, օրական կարգավորիչ ջրամբար, տուրբինային խողովակաշար, կայանային հանգույց: Գլխամասային հանգույցի մեջ մտնում է պատվարը, ջրամբարը, ջրընդունիչը եւ ջրթափ կառույցը: Պատվարը կառուցված է տեղական նյութերով, ավազակավային էկրանով: Այն ունի 41 մետր բարձրություն, 107 մետր երկարություն: Ջրամբարն ունի 13.6 միլիոն խորանարդ մետր օգտակար տարողություն: Ջրընդունիչի հաշվարկային թողունակությունը կազմում է 25մ3/վրկ, տեղակայված է Որոտան գետի ձախ ափին, ունի հարթ կրկնակի անցքերով փականներ: Ջրթափ կառույցը բաղկացած է վեց թունելախորշերից եւ մարգարտածաղկի տեսքով ջրընդունիչից: Գումարային թողունակությունը կազմում է 348 մ3/վրկ: Դերիվացիոն թունելն ունի 18 կիլոմետր երկարություն: Փաստացի թողունակությունը կազմում է 23 մ3/վրկ: Առբերիչ ջրանցքի ձախ կողմին տեղակայված է ոռոգման նպատակով ջրընդունիչը: Ջրավազանն ունի 80 հազար խորանարդ մետր տարողություն, ջրի մակարդակը հասնում է 1306,54 մետրի: Ջուրը 1900 մետր ընդհանուր երկարությամբ ճնշման խողովակաշարով հասնում է կայան: ՀԷԿ-ի շենքի մոտ խողովակաշարը բաժանվում է երեք մասի եւ յուրաքանչյուրը 11 մ3/վրկ թողունակությամբ միանում կայանի ագրեգատներին: Կայանի շենքը գտնվում է Որոտան գետի ձախ ափին, հաշվարկային ճնշումը 568,8 մ է, ունի երեք ագրեգատ, 157,2 ՄՎտ գումարային հզորություն, 630 միլիոն կՎտժ էլեկտրական էներգիայի տարեկան հնարավոր արտադրությամբ: | 
