93 ՀԱԶԱՐ ԴՈԼԱՐՈՎ ՎԱՃԱՌՎԵԼ Է 17-ՐԴ ԴԱՐԻ ՀԱՅԿԱԿԱՆ ՁԵՌԱԳԻՐ ԱՎԵՏԱՐԱՆ Հ.Ծ. Դեկտեմբերի 3-ին լոնդոնյան հանրահայտ Sotheby՛s աճուրդի սրահում 69.300 ֆունտ ստերլինգով (մոտ 93.000 դոլար) վաճառվել է վաղ 17-րդ դարի հայկական նկարազարդ ձեռագիր ավետարան, տեղեկացնում է «Արմինյն Միրոր-Սփեքթեյթր» շաբաթաթերթը: Հորթի կաշվից պատրաստված եւ զարդանկարներով դրոշմատպված կազմով գրքի նախնական գինը տատանվել էլ 7-10 հազար ֆունտ ստերլինգի միջեւ: Ենթադրվում է, որ 197 էջանոց մատյանը (147x100 մմ) պատրաստվել է Միջագետքի հինավուրց քաղաք Ամիդում (այժմյան Դիյարբեքիրի վիլայեթում) եւ ըստ աճուրդի կենտրոն-սրահի կայքում տեղադրված նկարագրությանՙ նշանակալիորեն նման է Բալտիմորի Ուոլտերս արվեստի պատկերասրահում (Walters Art Gallery) պահվող ձեռագրին, որն Ամիդի գրչատանը 17-դ դարի սկզբներին պատրաստել է գրիչ Մելքոնը եւ նկարազարդել է Հովհաննեսը: Գիրք-մատյանի յուրաքանչյուր բաժնի սկզբում կարելի է տեսնել մի ավետարանիչի մանրանկարը, իսկ հանդիպակաց էջում 27 տողերի վրա երկու սյունակներով գրավոր տեքստըՙ ոսկեզօծ օրնիթոմորֆիկ տառերով եւ բոլորգիր գլխազարդերով: Կան նաեւ բազմաթիվ լուսանցազարդեր: | 
