ՀԱՅԿԱԿԱՆ ՏԱՐԱԶՆԵՐԻ ԵՎ ՆԿԱՐՆԵՐԻ ՑՈՒՑԱՀԱՆԴԵՍ Հ. Ծ. Կազմակերպությամբ սփյուռք-հայրենիք մշակութային միության եւ ՀԲԸՄիության Ալեքսանդր վարժարանի եւ հովանավորությամբ Ավստրալիայի բարեխնամ առաջնորդ Տեր Հայկազուն եպիսկոպոս Նաճարյանի անցյալ շաբաթ օգոստոսի 15-ին եւ կիրակիՙ օգոստոսի 16-ին վերոնշյալ վարժարանի դահլիճում կայացել է ճանաչված արվեստագետ Գեւորգ Շատոյանի հայկական ավանդական տարազների եւ նկարների ցուցադրություն, որը մեծ հետաքրքրություն է առաջացրել ներկաների շրջանում: Միջոցառումը նվիրված է եղել հայկական Ցեղասպանության 100-րդ տարելիցին: Դրանից առաջ օգոստոսի 9-ին ՀԲԸՄիության Սիդնեյի մասնաճյուղի եւ հատկապես երիտասարդաց միության կազմակերպությամբ եւ դարձյալ Տեր Հայկազուն Նաճարյանի հովանավորությամբ «Կոնկուրս» թատերասրահում կայացել է մշակութային մի հոյակապ երեկո, որին իրենց մասնակցությունն են բերել Հայաստանից հրավիրված Մուրադ Մալխասյանն ու Տորոնտոյից (Կանադա)ՙ «Սասուն» պարային համույթը: Երեկոյի ընթացքում առաջին անգամ ելույթ է ունեցել ՀԲԸՄ-ի նորաստեղծ «Թամզարա» պարային խումբը: Միջոցառումները, ըստ Սիդնեյի ՀԲԸՄ-ի «Միութիւն» ամսաթերթի, աննախադեպ խանդավառություն են առաջացրել համայնքում: | 
