ՀԱՅ ԵՐԱԺՇՏՈՒԹՅՈՒՆԸ ՇՎԵԴԱԿԱՆ ՏՐԻՈՅԻ ՁԱՅՆԱԳՐՄԱՄԲ Նոյեմբերի 7-ին Շվեդիայի թագավորությունում ՀՀ արտակարգ եւ լիազոր դեսպան Արտակ Ապիտոնյանը Հայաստանի դեսպանատանն ընդունելության է արժանացրել շվեդական KMW դասական տրիոյի անդամներինՙ նրանց վերջին թողարկած հայ երաժշտության խտապնակի առթիվ: Դաշնակահարուհի Անն-Սոֆի Քլինգբերգի, ջութակահարուհի Աննետ Մանհայմերի եւ թավջութակահարուհի Սարա Վիյքի հետ (որոնց ազգանունների սկզբնատառերից կազմված է տրիոյի անունը) դեսպան Ապիտոնյանը քննարկել է Հայաստանի հետ հետագա համագործակցության հարցերը: Անցյալ տարի «dB Productions» ֆիրման թողարկել էր KMW տրիոյի «Հայկական դաշնամուրային տրիոներ» խտապնակը, որն ընդգրկում է Առնո Բաբաջանյանի, Գայանե Չեբոտարյանի եւ Տիգրան Մանսուրյանի ստեղծագործությունները: Ինչպես նշված է խտապնակի ծանուցման մեջ, «KMW դասական տրիոյի նախորդ երկու ալբոմները մեծ հաջողություն են գրանցել ինչպես Շվեդիայում, այնպես էլ արտասահմանում: Այս անգամ նրա ուշադրությնա կենտրոնում Հայաստանն է, եւ KMW-ն ներկայացնում է Չեբոտարյանի, Բաբաջանյանի եւ Մանսուրյանի հրաշագեղ երաժշտությունը, որը, Խաչատրյանի երաժշտության պես, հայ ժողովրդական երաժշտության բազմաթիվ տարրեր ունի: Իսկական հայտնագործությո՛ւն»: |
