ՄԵՐՁԱՎՈՐ ԱՐԵՎԵԼՔԻՆ ՆՎԻՐՎԱԾ ՊԻԵՍՆԵՐԻ ՓԱՌԱՏՈՆ ՍԱՆ ՖՐԱՆՑԻՍԿՈՅՈՒՄ Հ. Ծ. Առաջիկա նոյեմբերի 17-ից դեկտեմբերի 10-ը Սան Ֆրանցիսկոյի Պոտրերո թատերաբեմում տեղի է ունենալու «ReOrient 2017» թատերական կարճ պիեսների երկամյա հերթական փառատոնը, որին մասնակցելու են դերասաններ եւ թատերական խմբեր Հայաստանից, Իրաքից, Իրանից, Լիբանանից, Պաղեստինից, Թունիսից, Թուրքիայից, Ճապոնիայից, Անգլիայից եւ Ամերիկայից: «Golden Thread Productions-ը» առաջին ամերիկյան թատերական ընկերությունն է, որ Մերձավոր Արեւելքի խնդիրներին առնչվող պիեսներ է բեմադրում: Այս տարվա փառատոնի շրջանակներում, ըստ «Արմինյն Միրոր-Սփեքթեյթր» շաբաթաթերթի հաղորդագրության, առաջին անգամ «Golden Thread-ը» համագործակցել է Ամերիկայի դրամատուրգների եւ գրական գործերի պատասխանատուների հետ, որոնք արհեստավարժ գրաքննադատների խումբ են ուղարկել ուղղություն տալու պիեսների բովանդակությանն ու ներկայացման զարգացումներին: Փառատոնի ընթացքում յոթ նոր էկլեկտիկ առաջնախաղեր են ներկայացվելու, որոնց թվում են Բեթի Շամիեյի, Է.Հ. Բենեդիկտի եւ Թորանժ Եղիազարյանի պիեսները: Ընդհանուր առմամբ 14 երկրներից 79 պիես է ներկայացվել ժյուրիի ընտրությանը: Փառատոնին մասնակցող նորահայտ դրամատուրգների թվում է Սեւան Գրինը: Թորանժ Եղիազարյանը հիմնադիր գեղարվեստական ղեկավարներից է «Golden Thread (ոսկե թել) Productions-ի», որին աջակցում են Սան Ֆրանցիսկոյի Արվեստների հանձնախումբը, Ուոլտեր եւ Էլիզ Հաաս հիմնադրամը, պետհամալսարանը եւ Բարքլիի Կալիֆոռնա համալսարանի Մերձավոր Արեւելքի ուսումնասիրությունների կենտրոնը: Նկար 1. Թորանժ Եղիազարյան |
