ՄԱՐՑԱԳԵՏՈՒՄ ՁԿԱՆ ՊԱՇԱՐՆԵՐԸ ՎԵՐԱՑԵԼ ԵՆ Հ. Հ. Պատճառը Սեյրան Դարբինյանին պատկւանող ՀԷԿ-ն է Դեբեդ գետի Մարցագետ վտակի վրա կառուցված հիդրոէլեկտրակայանը շահագործման է հանձնվել նախորդ գարնանը: Նախատեսված էր, որ գետի վերին հոսանքներից ՀԷԿ-ի շահագործման համար պետք է վերցնեին ջրի ծավալի 70 տոկոսը, սակայն, ըստ Լոռու մարզից մեզ հասած տեղեկությունների, այս պահի դրությամբ գետով գրեթե ջուր չի հոսում: Լոռու մարզի Մարց գյուղի բնակիչ Նարեկ Հովհաննիսյանի ներկայացմամբՙ էկոհամակարգի խախտման հետեւանքով դադարել է կարմրախայտ եւ մուրծի ձկնատեսակների ձվադրման տեղաշարժը: «Բնապահպանության նախարարության անգործունյա լինելու, համատարած բարձիթողի վիճակի հետեւանքով մի քանի տարի առաջ մեկ այլ ՀԷԿ-ի կառուցմամբ, ցամաքեց Դսեղի ձորում գտնվող Չռչանի ջրվեժը: Գետի վերին հոսանքներում կառուցվում է նոր ՀԷԿ, որի պատճառով գետի 5-6 կմ հատված վերածվել է ծանծաղուտի», ասաց Նարեկ Հովհաննիսյանըՙ հավելելով, որ փոքր ՀԷԿ-ը կառուցվել է առանց թույլտվության: «Փաստաթղթեր չեն ներկայացվել բնապահպանության նախարարության բնապահպանական փորձաքննություն, ինչի մասին նախարարությունը հայտնել է 2012 թ. մայիսին: Չնայած ահազանգինՙ նախարարությունն այդպես էլ տեսչական ստուգումներ չանցկացրեց անօրինական ՀԷԿ-ում: ՀԷԿ-ը շահագործում է «Արգիշտի 1» ընկերությունը, որը գրանցված է Վանաձորի քաղաքապետ Սամվել Դարբինյանի եղբորՙ Սեյրան Դարբինյանի անունով», ասաց Նարեկը: | 
