ԱՎԱՐՏՎԵԼ Է ԴՊՐՈՑԱԿԱՆՆԵՐԻ ԱՌԱՐԿԱՅԱԿԱՆ ՕԼԻՄՊԻԱԴԱՅԻ ՔԱՂԱՔԱՅԻՆ ՓՈՒԼԸ Երեւանի քաղաքապետարանի տեղեկատվության եւ հասարակայնության հետ կապերի վարչություն Երեւանում ամփոփվել են դպրոցականների առարկայական օլիմպիադայի քաղաքային փուլի արդյունքները: Օլիմպիադային մասնակցել է 8-12-րդ դասարանների 8500 աշակերտ, որոնցից 381-ը արժանացել են առաջինից երրորդ կարգի դիպլոմների: Առաջին կարգի դիպլոմի արժանացած 67 մասնակիցներին պարգեւներն ու դիպլոմները հանձնել է Երեւանի քաղաքապետի տեղակալ Վանո Վարդանյանը: Երեւանի քաղաքապետարանի հանրակրթության վարչության պետ Գայանե Սողոմոնյանը առարկայական օլիմպիադայի անցկացման կազմակերպչական հարցերում տարեցտարի առաջընթաց է նկատում: «Հանձնաժողովի կազմն ամեն տարի փոփոխվում է: Այս տարի հանձնաժողովում ընդգրկված են եղել ուսուցիչներ ու բուհերի դասախոսներ: Մասնակիցներին հնարավորություն էր տրված բողոքարկելու արդյունքները, սակայն փաստը, որ թե՛ օլիմպիադայի ընթացքում, թե՛ ավարտից հետո որեւէ բողոք չի արձանագրվել, նշանակում է, որ դպրոցականների օլիմպիադան տարեցտարի ավելի լավ է կազմակերպվում: Ի դեպ, այս տարի այն անցկացվել է դեռեւս 2011 թվականին քաղաքապետ Տարոն Մարգարյանի կարգադրությամբՙ առարկայական օլիմպիադայի քաղաքային փուլի հաստատված կարգով»: Կազմակերպիչները նկատել են նաեւ, որ այս տարի բարձր է աշակերտների առաջադիմությունը հատկապես բնագիտական եւ տեղեկատվական տեխնոլոգիաներին առնչվեղ առարկաներից: | 
