ՕԲԱՄԱՆ ՆԱԽԱԳԱՀԱՑՈՒ Է ՀԱՄԱՐՈՒՄ ՀԻԼԱՐԻ ՔԼԻՆԹՈՆԻՆ Պ. Ք. ԱՄՆ-ի նախագահ Բարաք Օբաման կարծում է, որ նախկին պետքարտուղար Հիլարի Քլինթոնից կստացվի «հիանալի նախագահ»: Այդ մասին նա հայտարարել է ABC հեռուստաալիքին տված հարցազրույցում: Օբամայի խոսքերովՙ ինքը կանոնավորապես շփվում է Հ. Քլինթոնի հետ եւ նրան համարում է բարեկամ: «Նա ամեն ինչում չէ, որ համաձայնվում է ինձ հետ: Սակայն, ինչպես գիտեք, եթե սեփական թեկնածությունդ առաջադրում ես նախագահի պաշտոնի համար, ապա կարող ես պաշտպանել սեփական դիրքերդ», ասել է նախագահը: Օբաման մեծ շահագրգռություն է արտահայտել, որպեսզի հաջորդ նախագահը լինի Դեմոկրատական կուսակցության թեկնածուն: «Այնպես որ պատրաստվում եմ իմ կարելին անել, որպեսզի վստահ լինեմ դեմոկրատների թեկնածուի հաջողությանը», ասել է նա: Վերջին ամիսներին ԱՄՆ-ի բնակչության մեջ Օբամայի ազդեցությունը թուլացել է: Նրա ժողովրդականության վարկանիշն աննախադեպ ցածր մակարդակի վրա է: Այդ պատճառով էլ նոյեմբերի 5-ին կայացած Կոնգրեսի միջանկյալ ընտրությունների ժամանակ Սենատում մեծամասնություն ստացան հանրապետականները: Բարաք Օբաման ԱՄՆ-ի 44-րդ նախագահը դարձավ 2009 սկզբներին: Նա վերընտրվեց 2012-ին: Երկրորդ ժամկետն ավարտվում է 2017-ի հունվարին: | 
