«ԱՂԲԻ ՃԳՆԱԺԱՄՆ» ԱՊԱԿԱՅՈՒՆԱՑՆՈՒՄ Է ԲԵՅՐՈՒԹԸ Պ. Ք. Վարչապետը խոսեց «քաղաքական աղբի» մասին Արդեն մեկ շաբաթից ավելի է, ինչ Բեյրութի կենտրոնում կուտակված են աղբի պարկեր, անպետք շորեր, ցախավելներ եւ այլն: Լիբանանցիներն այդ ձեւով արտահայտում են իրենց դժգոհությունն ու զզվանքը երկրի քաղաքական պատասխանատուներից եւ նրանցից ազատվելու ցանկությունը: Դժգոհության շարժումը ծնունդ առավ հուլիսի վերջերին մայրաքաղաք Բեյրութում կենցաղային աղբի չտեղափոխման ճգնաժամից: Արաբերեն «Թալա աթ ռիհաթկում» (Դուք հոտած եք») անվանակոչված բողոքի շարժման մասնակիցները արտահայտում են ժողովրդի ընդհանուր դժգոհությունը իշխանությունների թափթփվածությունից եւ թայֆայականությունից, նշում է ֆրանսիական «Մոնդ» թերթը: Օգոստոսի 22-ին եւ 23-ին Բեյրութում բազմահազարանոց ցույցերի ժամանակ տեղի են ունեցել բախումներ կարգուկանոնի պահապանների հետ: «Մարդիկ դժգոհ են մասնավորապես վարչապետ Թամամ Սալամից: Փողոցներում աղբի կուտակումից բացի, առկա են ջրի եւ հոսանքի անջատումներ: Ցուցարարները դժգոհ են նաեւ երկրի դավանանքային բաժանումից, որն արտահայտվում է երկու կոալիցիաների գոյությամբ. մարտի 8-ի կոալիցիայի ղեկավարը շիաների «Հզբոլլահ» շարժումն է, իսկ մարտի 14-ի կոալիցիայինըՙ սուննիների «Ապագայի հոսանքը» («Ալ Մուսթակբալ»): Նման պայմաններում ավելի քան մեկ տարի է, ինչ չի հաջողվում երկրի նախագահ ընտրել: 2009-ից ի վեր չեն անցկացվել օրենսդրական ընտրություններ: Խորհրդարանը իր լիազորությունների ժամկետը երկու անգամ երկարաձգել էՙ հասցնելով մինչեւ 2017 թվականը: Օգոստոսի 23-ին ցուցարարների եւ ոստիկանների բախումների ժամանակ վիրավորների թիվն անցավ յոթանասունից: Կառավարության նստավայրի մոտ ցուցարարները քարեր եւ ավազով լի շշեր էին նետում ոստիկանների վրա: Ոստիկանությունը պատասխանում էր ջրի շիթերով եւ արտասվաբեր գազի նռնակներով: Ցուցարարներից մեկը Ռոյթեր գործակալության թղթակցին ասել է, որ մարդիկ դժգոհ են էլեկտրական հոսանքի հաճախակի ընդհատումներից եւ ջրի պակասից: Շատ ուրիշ խնդիրներ էլ կան, որոնցից է համատարած կոռուպցիան: Աղբահանության խնդիրը լցրեց ժողովրդի համբերության բաժակը: Վարչապետ Թամամ Սալամը խոստովանել է, որ բողոքավորների դեմ անհամարժեք ուժ է կիրառվել, եւ որ ինքը հակված է պատժելու «մեղավորներին»: Սալամը նաեւ ընդունել է, որ աղբահանության խնդիրը հանրության զայրույթի արդարացի պատճառ է: Նա ավելացրել է, որ էլ ավելի լուրջ հարց է «երկրի քաղաքական աղբի հարցը»: Իր հեռուստաելույթում վարչապետը զգուշացրել է համաքաղաքացիներին, որ առկա է քաղաքական փլուզման, այսինքն իր կառավարության անկման վտանգ: Նա պաշտոնյաներին եւ բոլոր քաղաքական ուժերին հորդորել է հանդես բերել պատասխանատվություն: Ավելի վաղՙ կիրակի օրը Բեյրութում կայացած ցույցի ժամանակ «Դուք հոտած եք» շարժումը հանդես էր եկել կառավարության հրաժարականի եւ օրենսդրական ընտրությունների անցկացման պահանջով: | 
