ՀԱՅԱՍՏԱՆՑԻ ԳՈՐԾԱՐԱՐԻ ԾԽԱԽՈՏԻ ՖԱԲՐԻԿԱՆՙ ՇՈՒՏՈՎ ԳԵՐՄԱՆԻԱՅՈՒՄ ԱՆԱՀԻՏ ՀՈՎՍԵՓՅԱՆ Գերմանական Բուխհոլց քաղաքում, որ տեղակայված է Համբուրգից 20 կմ հարավ, շուտով ծխախոտի ֆաբրիկա է կառուցվելու, սեփականատերը Հայաստանի գործարարներից է: «Համբուրգեր աբենթբլաթ» թերթը օգոստոսի վերջին գրում է, թե տեւական ժամանակ Բուխհոլցը խնդիրներ է ունեցելՙ գործարարների շրջանում արդյունաբերական իր տարածքների հանդեպ հետաքրքրություն արթնացնելու առումով, ինչն այժմ նրան հաջողվել էՙ շնորհիվ հայաստանցի մի գործարարի, որ մոտ 6 հեկտար տարածքը գնել է շուրջ 4, 3 միլիոն եվրոյով: Պայմանագրերը վերջերս են կնքվել, իրազեկում է թերթըՙ նշելով, թե եվրոպական շուկայի համար արտադրվելիք ծխախոտի ընկերության, նաեւ գործարարի անունը Բուխհոլցում դեռ ծածուկ են պահում: Հայերը 18 ամիս ժամանակ ունեն նորակառույցը նախագծելու համար, տեղեկանում ենք վերոհիշյալ աղբյուրից: Պայմանագրում նշված է, թե 2017- ի կեսերին շինարարության արտոնությունը առկա կլինի: Առաջին հերթին արտադրական հոսքագիծը պիտի պատրաստվի: Նախնական այս աշխատանքի համար քաղաքային իշխանությունները հաշվարկում են, թե մինչեւ 70 աշխատատեղ կստեղծվի: «Շատ ուրախ ենք, որ վերելակների արտադրությանը զուգահեռ հաջողել ենք գտնել նաեւ միջազգային մեկ այլ արտադրողի, սա վկայում է, որ Բուխհոլցը գերազանց ենթակառուցվածքների շնորհիվ գրավիչ վայր է», ասել է քաղաքագլուխ Յան Հենդրիկ Ռյոհզեն: Գերմանական թերթի վերնագիրն ընթերցելուն պես մի անուն տպվեց ենթադրություններիս ժապավենին: Վարդանյան: Հուսանքՙ սա հայաստանյան կայացած, հաջողակ բիզնեսի միջազգային ընդլայնում է, ոչ թե արտասահման տեղափոխություն: Եվ ՙ Հայաստանի համար նպաստավոր: Գերմանիա |
