ԸՆԴԴԻՄՈՒԹՅԱՆ ՊԱԹՈՍՆ ԻՆՉՊԵՍ ՄԻՇՏ ՏԵՂՆ Է Ընդդիմությունը երեք օր, այսօր էլ երեկոն էլ հետը, հանրահավաքներ է անցկացնում «Ազատության» հրապարակում, որտեղ հանրությանը կոչ է անում դեկտեմբերի 6-ին «ոչ» քվեարկել սահմանադրական փոփոխությունների հանրաքվեին: Երեկ «Ազատության» հրապարակում էին եւ ելույթներ ունեցան « Նոր Հայաստան» հանրային փրկության ճակատ անվանված միավորը ներկայացնող Րաֆֆի Հովհաննիսյանը, Ժիրայր Սեֆիլյանը, ՀԺԿ-ն ներկայացնող Ստեփան Դեմիրճյանը, ՀԱԿ-ից Լեւոն Զուրաբյանն ու Արամ Մանուկյանը, «Ոչ» շարժումը ներկայացնող Արշակ Մուսախանյանը, որոնք բոլորը հավաստիացնում էին, թե աննախադեպ կերպով վերահսկելու են հանրաքվեի քվեարկությունը եւ այդ օրը դարձնելու են Հայաստանում իրավիճակ փոխելու օր: Այսօր ժամը 18-ին, իսկ հանրաքվեի օրվա երեկոյան ժամը 20-ին նրանք իրենց կողմնակիցներին կրկին հրավիրեցին «Ազատության» հրապարակ` այդ օրը նրանք նորից պետք է իրականացնեն բազմաթիվ անգամ խոստացված իշխանության հեռացումը. «Այդ օրը վճռվելու է մեր ապագան», «Դեկտեմբերի վեցին մենք պատմական որոշում ենք կայացնելու», ավետում էին նրանք: Ինչպես տեսնում եք` մեր ընդդիմությանը պաթոսը չի պակասում ամեն անգամ դեմքի նույն արտահայտությամբ նույն խոսքերը կրկնելիս: |
