ԱՆՎԱՆԻ ԳՐՈՂ-ՀՐԱՊԱՐԱԿԱԽՈՍԻ ՀՈԲԵԼՅԱՆԸ Դեկտ.ի 2-ին, հանդիսավոր պայմաններում, Երեւանի Կ. Ստանիսլավսկու անվան թատրոնում տեղի ունեցավ անվանի գրող-հրապարակախոսի 80-ամյակին նվիրված երեկո: Մինչ այդ Անտոն Դելվիգի անվան «Հավատարմության համար բառին ու Հայրենիքին» համառուսաստանյան մրցանակի կազմկոմիտեի որոշմամբ Զորի Բալայանն արժանացել էր «Ոսկե Դելվիգ» հատուկ մրցանակի ռուս-հայկական հումանիտար կապերի զարգացման մեջ ահռելի ներդրման եւ ստեղծագործական անօրինակ նվաճումների համար: Զորի Հայկի Բալայանը ծնվել է 1935 թվականի փետրվարի 10-ին Ստեփանակերտ քաղաքում: Ծառայել է Բալթիական նավատորմում: Ավարտել է Ռյազանի բժշկական ինստիտուտը: 1963-ից մինչեւ 1973 թվականը աշխատել է Կամչատկայում որպես բժիշկ: Հրատարակել է պատմվածքներ եւ ակնարկներ բազմաթիվ պարբերականներում: 1975 թվականից աշխատել է որպես «Լիտերատուրնայա գազետա» թերթի սեփական թղթակից Հայաստանում: Ընտրվել է ԽՍՀՄ ժողովրդական պատգամավոր: Ավելի քան 70 գրքերի հեղինակ է: Արժանացել է ԽՍՀՄ Ժուռնալիստների միության, Հայաստանի պետական եւ այլ մրցանակների դափնեկրի կոչման: Բազմաթիվ գիտարշավների եւ ճամփորդությունների կազմակերպիչ եւ մասնակից է, այդ թվումՙ առագաստանավով շուրջերկրյա նավարկության: Երեք զավակների հայր է եւ վեց թոռների պապիկ: Շնորհավորում ենք: | 
