ԸՆԿԵՐՈՋՙ ՍՈՒՐԵՆ ՍԱՐԳՍՅԱՆԻ 65-ԱՄՅԱԿԻ ԱՌԹԻՎ ՌԱԿ Կենտրոնական վարչություն Հունիսի 10-ին լրացավ Ռամկավար Ազատական կուսակցության հնագույն անդամներից, բազմավաստակ գիտնական, մանկավարժ, Հայաստանի առաջատար համալսարանների դասախոս Սուրեն Սարգսյանի 65-ամյակը: Պատմական գիտությունների դոկտոր, պրոֆեսոր Սուրեն Սարգսյանը մեծ վաստակ ունի Հայաստանում ժամանակակից պատմագիտության զարգացման գործում: Դեռ ուսանողական տարիներից տարվելով հայ ավանդական կուսակցությունների պատմությամբ, Սուրեն Սարգսյանն իր գիտական ողջ ներուժը նվիրեց հայկական ազգային ազատագրական պայքարի պատմության եւ դրանում հայկական քաղաքական ավանդական ուժերի դերակատարության ուսումնասիրությանը: Պրոֆեսոր Սարգսյանը հեղինակ է մեծ թվով գիտական աշխատաքների, հոդվածների ու մենագրությւոների, որոնցից կարելի է առանձնացնելՙ «Հայ Սահմանադրական ռամկավար կուսակցություն (1908-1921 թթ.)», «Արմենիա» պարբերականը ազատագրական գաղափարախոսության ակունքներում», «1885-1908 թթ. հայ ժողովրդի ազգային ազատագրական պայքարը Արմենական գործիչների գնահատմամբ», «Մկրտիչ Փորթուգալյանի հասարակական-քաղաքական գործունեությունը եւ «Արմենիա» պարբերականը» եւ այլ մենագրություններ, որոնք կարեւոր դեր են ունեցել հայ ժողովրդի քաղաքական պատմության ուսումնասիրության գործում: Սուրեն Սարգսյանը հեղինակ է նաեւ մի քանի տասնյակի գիտական հոդվածների եւ աշխատանքների: Արդեն երկար ժամանակ նա ծավալում է դասախոսա-մանկավարժական գործունեություն ԵՊՀ-ում, Գլաձորի եւ Հյուսիսային համալսարաններում: Անգնահատելի է Սուրեն Սարգսյանի կուսակցական-քաղաքական գործունեությունը: 1990թ.ին անդամագրվելով Ռամակավար Ազատական կուսակցությանը նա ակտիվ գործունեություն է ծավալել Հայաստանում կուսակցության կայացման ու հզորացման գործում: 1990թ. մասնակցել է ՌԱԿ Արմենական ակումբի հիմնադրմանը, 1991թ. մաս է կազմել ՀՌԱԿ-ի հիմնադիր խորհրդին, կազմելով կուսակցության քաղաքական ու կանոնադրական առաջին փաստաթղթերըՙ ՀՀ-ում այդ կառույցի գրանցման համար: 2009թ.ին, ՌԱԿ-ի համար ամենածանր շրջանում վերադարձել է ակտիվ կուսակցական-քաղաքական գործունեությանըՙ նպաստելով կուսակցության վերածննդին Հայաստանում: 2009թ. մաս է կազմել Արմենական-ՌԱԿ կուսակցության հիմնադիր խորհրդին եւ ապա վարչությանը: Հետագայում նրա ակտիվ ջանքերով ու երկարատեւ բանակցությունների արդյունքում Հայաստանում կայացել է ՀՌԱԿ եւ Արմենական-ՌԱԿ կուսակցությունների վերամիավորումը, Մայր հայրենիքում վերակազմելով Ռամկավար Ազատական կուսակցությունը: 2012թ.-ից ՌԱԿ Կետրոնական վարչության անփոխարինելի անդամ է, եւ ղեկավարելով կուսակցության գաղափարա-քարոզչական բաժինըՙ ակտիվ մասնակցություն ունի քաղաքական այդ կառույցի հզորացմանը ՀՀ-ում: ՌԱԿ Կենտրոնական վարչությունը շնորհավորում է իր վաստակավոր ընկերոջ, պրոֆեսոր Սուրեն Սարգսյանի 65-ամյակը, մաղթելով նրան քաջ առողջություն, երջանկություն եւ ստեղծագործական ու գիտական գործունեության երկարատեւություն: *** «Ազգ»ի խմբագրությունը միանում է շնորհավորանքներին ու բարեմաղթանքներինՙ իր աշխատակցին մաղթելով ամենայն բարիք եւ ստեղծագործական անսպառ եռանդ: | 
