«ՍՊԻՆ» ՀԱՎԱՆԱԲԱՐ ԿՑՈՒՑԱԴՐՎԻ ԹՈՒՐՔԻԱՅՈՒՄ Հ. Ծ. Գերմանիայում ապրող թուրք ռեժիսոր Ֆաթիհ Աքինի «Սպին» ֆիլմը Գերմանիայում եւ ապա նոյեմբերի 7-ին Ֆրանսիայում ցուցադրվելուց հետո դեկտեմբերի 5-ից հավանաբար կհայտնվի Թուրքիայի հետեւյալ քաղաքներիՙ Անկարայի, Ստամբուլի, Իզմիրի, Անթալիայի եւ Էսկիշեհիրի կինոթատրոնների էկրաններին, տեղեկացնում է Փարիզից անկախ լրագրող Ժան Էսքիյանը : «Սպին» էպիկական կինոպատում է հայերի Ցեղասպանության մասին: Նազարեթ Մանուկյանի գլխավոր դերը ֆիլմում կատարում է ֆրանսա-ալժիրցի դերասան Թահար Ռահիմը: Մահմեդականությունն ընդունելը մերժելուց հետո Նազարեթը հայտնվում է աշխատանքային ճամբարում, որտեղից փախուստի փորձ կատարելիս վզին դանակի հարված է ստանում (այստեղից էլ ֆիլմի անվանումըՙ «Սպին») եւ որպես մահացած ընկնում գետնին: Նրան փրկում է Մեհմետը, բայց նա կորցնում է խոսելու ունակությունը: Մղձավանջային օրեր ապրելով նա շարունակում է փնտրտուքները գտնելու կնոջն ու երկու դուստրերին: Սկսվում է նրա ոդիսականը, որը նրան տանում է նախ Ռաս էլ-Այն, ապա Հալեպ, Կուբա եւ ի վերջո Մ. Նահանգներ: Պատմությունը, ըստ «Արմինյն Միրոր-Սփեքթեյթր» շաբաթաթերթում տպագրված Մուրիել Միրաք-Վայսբախի հոդվածի, տխուր է, սրտաճմլիկ, բայց իրական: Եվ դրանում է ֆիլմի գեղարվեստական արժանիքը: Թուրք ռեժիսորը Համբուրգում է ծնվել 1973 թվին եւ մեծապես օգտվել գերմանացի ցեղասպանագետ Վոլֆգանգ Գուստի մասնագիտական խորհուրդներից: | 
