ՀԱՅ ՆԿԱՐԻՉՆԵՐԻ ԵԶԱԿԻ ԿՏԱՎՆԵՐԸ «Studio Z-ՈՒՄ» Հ. Ծ. Ազգային եւ միջազգային ճանաչման արժանացած, աշխարհի տարբեր անկյուններում ստեղծագործած եւ ստեղծագործող, անցյալի եւ ներկայի հայ նկարիչների 125 բնօրինակ աշխատանքներ մինչեւ հոկտեմբերի 17-ը ցուցադրվել են Ռոուդ Այլենդի մայրաքաղաքՙ Պրովիդենսում (ԱՄՆ), «Հայ նկարիչներ: Հայկական արվեստի բնագիր նմուշների հարուստ հավաքածո» խորագրի ներքո: Բուչըր Բլոկ Միլում տեղակայված արվեստանոցից (սեփականատեր եւ տնօրենՙ Պերճ Զոբյան) ստացված հաղորդագրությունը տեղեկացնում է, որ ներկայացված են եղել Գեւորգ Մուրադի, Սիմոն Սամսոնյանի, Զարեհ Մութաֆյանի, Ռուբեն Նաքյանի, Էլիբեկյան ընտանիքի 3 սերունդների, Ալեքսանդր Գրիգորյանի, Հակոբ Հակոբյանի, Ռաֆայել Աթոյանի, Գառնիկ Նալբանդյանի, Անուշ Բաղրամյանի, Մարտին Բարուշյանի, Սեդա Բեքարյանի, Նորա Չավուշյանի, Սամվել Գարեգինյանի, Էմմա Գրիգորյանի, Լեւոն Բարյանի եւ այլոց կտավները: Հաղորդագրությունը նաեւ ցավով նշում է, որ հավանաբար սույն ցուցահանդեսը «Studio Z-ի» վերջին միջոցառումը լինի, քանի որ շենքի ներկա սեփականատերը պահանջել է ազատել տարածքը: Ավելացնենք, որ արվեստի այս կենտրոնը իր դռներն էր բացել 2013 թվի հոկտեմբերին: Սեփականատեր Պերճ Զոբյանը տասնյոթ ամիս վերանորոգման աշխատանքներ էր կատարել այնտեղ պատշաճ եւ հարմարավետ կենտրոն հիմնելու նպատակով: Հաղորդագրությունը հետաքրքրասեր արվեստագետներին եւ արվեստասեր հասարակությանը խորհուրդ է տալիս հավելյալ տեղեկությունների համար այցելել «www.gofundme.com/help studioZ» կամ «http://galleryz prov.com» կայքերը: |
