ԶՈՐՅԱՆ ԻՆՍՏԻՏՈՒՏԻ ՆՈՐ ՆԱԽԱՁԵՌՆՈՒԹՅՈՒՆԸ Հ. Ծ. Տորոնտոյում (Կանադա) գործող Զորյան ինստիտուտը եւ նրա «Ցեղասպանության եւ մարդու իրավունքների ուսումնասիրությունների միջազգային ինստիտուտը» հանդես են եկել նոր նախաձեռնությամբ, որ կրում է «Սիրիահայ փախստականների բանավոր պատմությունների ծրագիր» խորագիրը: Ծրագիրը, ըստ «Արմինյն Միրոր-Սփեքթեյթր» շաբաթաթերթի, բաղկացած է լինելու 2 մասից: Առաջին մասում, որն արդեն սկսվել է նոյեմբերի 7-ին, Կանադա ժամանած սիրիահայ փախստականների հետ հարցազրույցների կազմակերպումն է եւ նկարահանումը: Երկրորդ մասումՙ նյութերի խմբագրումը, պատճենավորումը եւ պահպանումը արխվիներում: Նպատակն է պատերազմի պատճառով հարկադրված փախստականի կարգավիճակ ստացած եւ Կանադայում ապաստանած սիրիահայերից անմիջական պատմություններ լսել, թե ինչպիսին էր կյանքը նախքան պատերազմը, պատերազմի օրերին եւ թե ինչպես են հարմարվում իրենց նոր միջավայրինՙ Կանադայում: Դա սոցիոլոգիական փոփոխությունների եւ հոգեբանական ապրումների մի յուրահատուկ պատմություն է լինելու, որն ի պահ է դրվելու ապագա սերունդների համար: 2015-ի դեկտեմբերից սկսած ընդհանուր առմամբ 33 հազար սիրիացի է մուտք գործել Կանադա, որոնցից հազարավորներ հայկական ծագում ունեն: | 
