ԴԻՐԻԺՈՐ ԱՌԱՔԵԼՅԱՆԻ ՆՈՐ ՊԱՇՏՈՆՆ ՈՒ ՄՐՑԱՆԱԿՆԵՐԸ Հ.Ծ. Ամերիկահայ դիրիժոր Տիգրան Առաքելյանը նշանակվել է «Northwest Mahler» փառատոնի նվագախմբի դիրիժոր: Նա նաեւ բրոնզե մեդալ է նվաճել «Global Music Awards» մրցանակաբաշխության ժամանակ եւ եզրափակիչ փուլ է հասել «American Prize in Orchestral Programming» նվագախմբային ծրագրավորման մրցույթում: Մասնագետների եւ հատկապես ուսանողների համար նախատեսված «Northwest Mahler Festival» ամառային փառատոնը հիմնվել է 1995-ին եւ մասնավորապես ներկայացնում է ամբողջական դասական գործեր: Այս տարի հուլիսի 21-ին Սիետլում կայանալիք փառատոնում նվագախումբը կատարելու է ավստրիացի կոմպոզիտոր եւ դիրիժոր Գուստավ Մահլերի (1860-1911) 5-րդ սիմֆոնիան: Առաքելյանը «Bainbridge Island Youth Orchestra», «Federal Way Youth Symphony» եւ «Port Townsend Community Orchestra» նվագախմբերի դիրիժորն է: Նվագախմբային ծրագրավորման Վիտաուտաս Մարիյոսիուսի անվան ամերիկյան մրցանակը շնորհվում է ռեպերտուարի ճիշտ ընտրություն կատարելու եւ դրանով երաժշտասեր հասարակությանը կրթելու ասպարեզում նշանակալի լումա ներդրած դիրիժորին: | 
