ԱՅՈՒՐՎԵԴԱՆ ՀԱՅԵՐԵՆ ՎԱՀԱԳՆ ՍԱՐԳՍՅԱՆ Հայ եւ հնդիկ ժողովուրդների մշակութային փոխհարաբերությունները դարերի պատմություն ունեն եւ պատմության որոշակի հատվածներում նույնիսկ ներթափանցված են: Հայերի մտապատկերում Հնդկաստանն ու նրա ժողովուրդը նախապատմական քաղաքակրթության մի կենտրոն են, որից սկիզբ են առնում ու աշխարհի չորսդին են սփռվում Արեւելքի համահավաք գույներն ու մշակույթը, փիլիսոփայությունն ու կենսաձեւը, որ հազարամյակներ շարունակ ապացուցել է աշխարհին իր կենսունակությունը: Եվ հիմա էլ, ժամանակակից հնդիկ գիտակների միջոցով հնդկական քաղաքակրթությունը վերաիմաստավորվում եւ արդի դարաշրջանին համահունչՙ նոր ապրելակերպի, նոր կենսափիլիսոփայության ակունք է դառնում: Մեր այս նկատառումները վերաբերում են վերջերս «Հայաստան» հրատարակչության լույս ընծայած Աճարյա Բալկրիշնայի «Այուրվեդայի գիտության գործնական ձեռնարկ» գրքին, որը լիարժեք ու համապարփակ ուղեցույց է ժամանակակից մարդու համար առողջ ապրելակերպի, ով ապրում է լարված կյանքով, էկոլոգիական ոչ նպաստավոր պայմաններում, երկրագնդի համընդհանուր աղտոտվածության եւ քիմիացման աննախադեպ իրավիճակում: Համաշխարհային էկոլոգիական աղետը մարդկությանը հասցրել է մի այնպիսի մակարդակի, որ անհրաժեշտություն է առաջանում յուրաքանչյուր անհատի համար ինտենսիվ մտածել առողջության բարելավման եւ կյանքի որակի մասին: «Այուրվեդան» ձեռք է մեկնում, օգնում եւ ճիշտ ուղիներ ցույց տալիս մոլորյալ մարդկությանը, թե ինչպես ճիշտ կազմակերպել կյանքի բնականոն ընթացքըՙ զերծ հիվանդություններից եւ ձեռքբերովի արատներից, սկսած օրվա ռեժիմը ճիշտ կազմակերպելուց մինչեւ սննդակարգ, նյարդային համակարգի բարելավում, հոգեբանակ բարդույթների վերացում եւ այլն: Հատկանշական է, որ գրքի հեղինակը, կիրառելով հնդկական կենցաղավարության դարավոր փորձը եւ փիլիսոփայական հայեցակարգը (որտեղ բազում բարդ տերմիններ ու հասկացություններ կան օտար ընթերցողի համար), գիտական-հանրամատչելի վերլուծությամբ է մատուցում նյութըՙ պարզ ու մատչելի շարադրությամբ, որն, ըստ էության, ընկալվում է բոլորի կողմիցՙ ինչ ազգության էլ որ նա լինի: Հայ ընթերողի համար Աճարյա Բալկրիշնայի այս ձեռնարկի հայերեն թարգմանությունը յուրահատուկ մի նվեր է հայ ընթերցողինՙ մարդագիտության անհայտ կողմերը արեւերես հանելու, ճանաչելու եւ կառավարելու ինքն իրենՙ մարմնակազմությունը, ֆունկցիոնալ գործունեությունը, հոգու (ներսի) աշխարհը, որը փորձ է անում համակշռված ներդաշնակության մեջ պահել արտաքին աշխարհի հետ: «Այուրվեդայի» օգնությամբ անհատը կարողանում է պայքարել, դիմագրավել հիվանդություններ առաջացնող չարիքին: Սա հայեցակարգ է ճիշտ ապրելակերպի մասին, որը խորացնում է մեր գիտելիքներն ընդհանրապես մարդու եւ բնության հետ նրա փոխառնչության մասին: Հարկ է նշել անգլերենից կատարած Աշխեն Բախչինյանի եւ Լուսինե Ղալումյանի բարձրորակ թարգմանության մասին, ինչը առավել գրավիչ է դարձնում գիրքը հայ ընթերցողինՙ դառնալով նրա մտերիմը եւ ուղեկիցը կյանքում: Հավելենք նաեւ, որ «Այուրվեդան» այսօր աշխարհի ամենամեծ պահանջարկն ունեցող եւ հետեւաբար ամենից շատ թարգմանվող բեսթսելերներից է, վերջին մի քանի տարում միայն անգլերեն եւ հնդկերեն հրատարակությունները միլիոնավոր տպաքանակներով են հաշվվում: |
