ՎԵՐՋԻՆ ՊԱՀԻՆ ԹՈՒՐՔԱԿԱՆ ԿՈՂՄԸ ՉԵՂՅԱԼ ՀԱՅՏԱՐԱՐԵՑ ԵՐԵՎԱՆ-ՎԱՆ-ԵՐԵՎԱՆ ԹՌԻՉՔԸ Հ. Չ. Մարտի 8-ի համարում «Ազգը» անդրադարձել էր Երեւան-Վան-Երեւան թռիչքի առթիվ ադրբեջանական հրոսակի վայնասունին, թե ապրիլի 3-ին թուրքերն Ադրբեջանին կզոհաբերեն Հայաստանին: Մինչդեռ թռիչքի իրականցման դեպքում թուրքական կողմը Վան այցելելու հնարավորություն էր տալիս Հայաստանի քաղաքացիներին, դա ենթադրվում էր իրականացնել շաբաթը երկու օրՙ զուտ զբոսաշրջային նպատակով: Առաջին թռիչքը նախատեսվում էր ապրիլի 3-ին, իրականացնելու էր թուրքական մասնավոր ավիաընկերությունը: Սակայն վերջին պահին, ինչպես ապրիլի 2-ին նշել է CNN-turk-ը, չեղյալ է հայտարարվել: Թուրք պատասխանատուները թռիչքը չեղյալ հայտարարելու պատճառների մասին Ռոյթերի հարցը թողել են անպատասխան, եւ լրատվական այս գործակալությունը եզրակացրել է. «Չեղյալ հայտարարելու որոշումն ընդունվեց այն բանից հետո, երբ թռիչքի առնչությամբ մտահոգություհ հայտնեց Ադրբեջանը»: Ռոյթերն այդ մտահոգությունը պայմանավորում է Ադրբեջանի նախագահ Ալիեւի խորհրդականներից Ալի Հասանովի խոսքով. «Երբ նման քայլ է ձեռնարկում Ադրբեջանի հետ ռազմավարական համանման շահեր ունեցող երկիրը, մենք այդ քայլին կրկնակի լուրջ ենք վերաբերվում: Սա ոչ միայն մեր, այլեւ ողջ թուրք հասարակության տեսակետն է»: |
