ՃԱՆԱՉՈՒՄԸ ԱԿՏ Է, ՈՐ ՆՊԱՍՏՈՒՄ Է ՀԱՆՑԱԳՈՐԾՈՒԹՅՈՒՆՆԵՐԻ ԿԱՆԽՄԱՆԸ Վ. Պ. Ցեղասպանությունների ճանաչումը ակտ է, որ նպաստում է մարդու արժանապատվության հանդեպ հարգանքին ու մարդկության դեմ հանցագործությունների կանխմանը: Այսպիսի հայտարարություն է ընդունվել Եվրոպայի խորհրդի խորհրդարանական վեհաժողովականներից 21-ի ստորագրությամբ` ապրիլի 24-ին Ստրասբուրգում: Վեհաժողովի գարնանային նստաշրջանի 21 մասնակիցները կոչ են արել ԵԽԽվ անդամներին` անհրաժեշտ քայլեր ձեռնարկել Օսմանյան կայսրությունում հայերի եւ մյուս քրիստոնյաների դեմ 20-րդ դարասկզբին իրագործված ցեղասպանության ճանաչման ուղղությամբ, ինչը «մեծապես կնպաստի մարդկության դեմ այդ խորշելի հանցագործության` թուրքական իշխանությունների կողմից հնարավոր նման ակտով ճանաչմանը եւ, որպես արդյունք, կտանի դեպի Հայաստան-Թուրքիա հարաբերությունների նորմալացմանը` այդպիսով նպաստելով տարածաշրջանային խաղաղությանը, անվտանգությանն ու կայունությանը»: Հայտարարությունը ստորագրած վեհաժողովականները հիշեցրել են, որ Հայոց ցեղասպանության փաստը փաստագրված է, ճանաչված, վերահաստատված մամուլի ու ականատեսների վկայություննեով, օրենքներով, բանաձեւերով ու հայտարարություններով, որ արվել են ՄԱԿ-ի, Եվրոխորհրդարանի ու Եվրոպայի խորհրդի անդամ երկրների խորհրդարանների կողմից: | 
