ՄԵԿ ԶՈՀ ԵՎ ՄԵԿ ՎԻՐԱՎՈՐ. ՑԱՎԱԼԻ ՄԻՋԱԴԵՊ ԲԱՆԱԿՈՒՄ Հ. Հ. Մայիսի 15-ին Նոյեմբերյանի զորամասում տեղի է ունեցել արտակարգ դեպք: Երեք զինծառայողների միջեւ տեղի ունեցած բուռն վիճաբանությունն ավարտվել է ողբերգությամբ: Զինծառայող Դավիթ Խաչատրյանն իրեն ամրակցված զենքից կրակ է արձակել, ինչի հետեւանքով Մարտունու շրջանի Վերին Գետաշեն գյուղի բնակիչ, զինծառայող, 1994թ. ծնված Լյուքս Ստեփանյանը գլխի շրջանում ստացած հրազենային կրակոցից զոհվել է: Իսկ մյուս զինծառայող Հրաչյա Սարգսյանը դարձյալ գլխի շրջանում ստացել է հրազենային վիրավորում եւ գտնվում է ՊՆ կենտրոնական կլինիկական զինվորական հոսպիտալում: Բժիշկները նրա առողջական վիճակը գնահատում են ծանր: ՊՆ քննչական ծառայությունից «Ազգ»-ին հայտնեցին, որ ՊՆ քննչական ծառայությունում հարուցվել է քրեական գործ 104-րդ հոդվածի 2-րդ մասի 6-րդ կետովՙ սպանությունՙ շատերի կյանքի համար վտանգավոր եղանակով հատկանիշների համաձայն: Խաչատրյանը ձերբակալված է: Կատարվածի առնչությամբ հայտարարություն է տարածել Մարդու իրավունքների պաշտպան Կարեն Անդրեասյանըՙ մշելով, որ նման դեպքերում պատասխանատվության բեռը կրում են ՊՆ քննչական մարմինը, զինվորական դատախազությունն ու դատարանները: Հաշվի առնելով, որ նման դեպքերը հաճախակի բնույթ են կրում, օմբուցմենն առաջարկում է արմատական փոփոխություններ: Անդրեասյանը պաշտպանության նախարար Սեյրան Օհանյանին առաջարկում է հնարավոր ձեւաչափով ԱԺ ներկայացնել տարեկան հաշվետվություն զինված ուժերում մարդու իրավունքների վիճակի, մասնավորապես մահացության դեպքերի առաջացման պատճառների, կանոնադրային հարաբերությունների խախտումների, խեղումների, բժշկական ծառայության տրամադրման վիճակի, ՀՀ ՊՆ-ի կողմից իրավիճակի փոփոխությանն ուղղված գործողությունների եւ դրանց արդյունքների մասին: Օմբուդսմենի այս հայտարարությունից հետո չի ուշացել պաշտպանության նախարարության արձագանքը: Նախարարի մամուլի խոսնակ Արծրուն Հովհաննիսյանը Անդրեասյանին հիշեցրել է, որ իրենք խնդիրների առողջ եւ թափանցիկ քննարկումներ կազմակերպելու պատրաստակամություն են հայտնել եւ նման քննարկումներ նախաձեռնել: «Նշված հարցերի վերաբերյալ ՊՆ-ն կլինի բոլոր շահագրգիռ կողմերի եւ կառույցների մասնակցությամբ լսումների անցկացման նախաձեռնողը: Ընդ որումՙ նման լսումները մենք կազմակերպում ենք առանձին-առանձին նշված բոլոր հարցերի մասով, քանի որ դրանք պահանջում են մանրակրկիտ քննարկումներ եւ ոչ թե ընդհանրացում: Նման քննարկումներ արդեն եղել են ԱԺ-ում եւ լինելու են հետայսու», ասել է Հովհաննիսյանըՙ հավելելով, որ նման քննարկումներ կլինեն նաեւ ՊՆ-ում: |
