ՀԻՇՈՂՈՒԹՅԱՆ ԿԵՆՏՐՈՆ ՖՐԱՆՍԻԱՅՈՒՄ Հ. Ծ. Հոկտեմբերի 20-ին Ֆրանսիայի մշակույթի նախարար Օրելի Ֆիլիպետտին Լիոնի արվարձաններից Դեսին քաղաքում հիմնարկեքն է կատարել «Հայկական ազգային կենտրոնի», տեղեկացնում է Ժան Էսքիյանը Փարիզից: Այդ առթիվ հավաքված ներկաների առաջ ելույթ ունենալով` նախարարուհին հայտարարել է. «Չպետք է մոռացվի այն, ինչ տեղի ունեցավ 1915-ին: Փաստերը հաստատված են եւ հայերի ցեղասպանությունը օրենքի ուժով ճանաչված է Հանրապետությունում: Ժխտման քարոզները ընդունելի չեն կարող լինել: Այդ պատճառով էլ երկրի ղեկավարիՙ Ֆրանսուա Օլանդի խոստումներին ընդառաջելով, կառավարությունը իրավական միջոցներ է որոնում մեր սահմանադրության եւ միջազգային մեր պարտավորություններին համապատասխան ելք գտնել հարգելու համար զոհվածների հիշատակը»: Կենտրոնը գերարդիական ոճով կառուցված շենքի մեջ է, ունի գրադարան, գիտաժողովների դահլիճ եւ 100 քառ. մետր տարածությամբ արխիվային բաժին: Այնտեղ հավաքված են մոտ 12 հազար անուն գրքեր եւ 110 հազար փաստաթղթեր, որոնց մի մասը արդեն մշակված եւ թվայնացված է: Դրանք առնչվում են հայոց պատմությանը, լեզվին, մշակույթին եւ արվեստներին: | 
