ՎԻՎԱՍԵԼ-ՄՏՍ-Ի ԱՇԽԱՏԱԿԻՑՆԵՐԻ ՀԱՄԱՐ ԱՎԱԳ ՈՒՐԲԱԹԸ ՈՉ ԱՇԽԱՏԱՆՔԱՅԻՆ ՕՐ Է ՎիվաՍել-ՄՏՍ-ը տեղեկացնում է, որ ընկերության աշխատակիցների համար Ավագ ուրբաթն ավանդաբար ոչ աշխատանքային օր է: Այս տարի Ավագ ուրբաթը նշվում է ապրիլի 18-ին: Ծաղկազարդը, որով սկսվում է Սբ. Հարության տոնին նախորդող ավագ շաբաթը, այս տարի նշվել է ապրիլի 13-ին: Ավագ հինգշաբթին, որն այս տարի նշվում է ապրիլի 17-ին, նվիրված է վերջին ընթրիքին: Այդ օրը երեկոյան կատարվում է Խավարման կարգ, որը վերաբերում է Ավագ ուրբաթին`խորհրդանշելով Տիրոջ խաչելությունը: Ավագ ուրբաթ օրը կատարվում է Խաչելության կարգ, իսկ երեկոյան ժամերգությունից հետո` Թաղման կարգ. ծաղիկներից եւ ծառի ճյուղերից պատրաստված Հիսուս Քրիստոսի խորհրդանշական գերեզմանը, պտտում են եկեղեցու շուրջ: Կիրակի` ապրիլի 20-ին, մենք կնշենք Հիսուս Քրիստոսի Հարության տոնը, իսկ եկեղեցիներում կմատուցվի Սբ. Պատարագ: Հիսուս Քրիստոսի հարությունը քրիստոնեական հավատքի հիմքն է եւ խորհրդանշում է կյանքի եւ լույսի հաղթանակը` մահվան եւ խավարի հանդեպ: Տոնը նաեւ կոչում են Զատիկ, որը նշանակում է զատում, բաժանում, հեռացում մեղքերից եւ վերադարձ առ Աստված: Զատիկը եկեղեցու հինգ տաղավար տոներից մեկն է: Ավագ շաբաթը, որը կոչվում է նաեւ Ճրագալույցի Զատիկ, խորհրդանշում է Հիսուսի կողմից դժոխքի ավերումը եւ արդար հոգիների ազատումը: Ավագ շաբաթի պատարագով մենք սկսում ենք Սբ. Զատկի տոնակատարությունը` միմյանց ողջունելով «Քրիստոս հարյավ ի մեռելոց» ավետիսով եւ պատասխանելով «Օրհնյալ է հարությունը Քրիստոսի»: Հայի ինքնության եւ քրիստոնեության օրրան Հայաստանի հանդեպ մեր նվիրումը պարտավորեցնում են պահպանել եւ հանրության շրջանում տարածել մեր կրոնական տոներն ու հիշատակության օրերը: Սեփական պատմության ճանաչումը դեպի ապագան տանող լավագույն ճանապարհն է: ՎիվաՍել-ՄՏՍ-ի սպասարկման կենտրոնները ուրբաթ օրը կգործեն իրենց կանոնավոր ժամերին, իսկ զանգերի կենտրոնն, ինչպես միշտ, կիրականացնի շուրջօրյա սպասարկում: | 
