2015-Ի ՊԵՏԱԿԱՆ ԲՅՈՒՋԵՆ, ՏՆՏԵՍԱԿԱՆ ԱՃԸ, ՆՎԱԶԱԳՈՒՅՆ ԱՇԽԱՏԱՎԱՐՁԻ ԵՎ ԿԵՆՍԱԹՈՇԱԿՆԵՐԻ ԲԱՐՁՐԱՑՈՒՄԸ Ա. Մ. Ֆինանսների փոխնախարար Պավել Սաֆարյանը երեկ կառավարության հաստատմանը ներկայացնելով 2015-ի պետական բյուջեի նախագիծը, մասնավորապես հայտնեց, որ բյուջեի եկամուտները եկող տարի կկազմեն 1 տրլն 184 մլրդ դրամ, որի գերակշիռ մասը` 1 տրլն 131 մլրդ դրամը կկազմեն հարկային եկամուտները եւ պետական տուրքերը: Ծախսերը կկազմեն 1 տրլն 298 մլրդ դրամ, դեֆիցիտը 114 մլրդ դրամ: Հիշեցնենք, որ այս տարվա` 2014-ի բյուջեի եկամուտները ծրագրված են 1 տրլն 135 մլրդ դրամ, որից 1 տրլն 97 մլրդ դրամը կկազմեն հարկային եկամուտներն ու պետական տուրքերը: Ծախսերն այս տարի նախատեսված են 1 տրլն 246 մլրդ դրամ, դեֆիցիտըՙ մոտ 110 մլրդ դրամ: Այսինքն, բյուջե 2015-ով նախատեսվում է եկամուտները ավելացնել 49 մլրդ դրամով, ծախսերը` 52 մլրդ դրամով, դեֆիցիտը` 4 մլրդ դրամով: Եկող տարի տնտեսական (ՀՆԱ) աճը ծրագրվում է 4,1 տոկոս, այս տարի նախատեսված է 5,2 տոկոս: Գումարային առումով դա նշանակում է, որ անվանական ՀՆԱ-ն կկազմի 4 տրլն 867 մլրդ դրամ կամ մոտ 12 մլրդ դոլար: Հարկեր/ՀՆԱ հարաբերակցությունը կկազմի 24,3 տոկոս` 2014-ի 24 տոկոսի դիմաց: Կառավարության հաստատած բյուջեով 2015-ում նախատեսվում է բարձրացնել կենսաթոշակները, ինչի համար լրացուցիչ 32 մլրդ դրամ է հատկացվելու: Արդյունքում, ըստ փոխնախարարի, միջին կենսաթոշակը ներկայիս 36 հազար դրամի փոխարեն կդառնա 41 հազար դրամ: Կբարձրանա նաեւ նվազագույն աշխատավարձը` ներկայիս 50 հազար դրամի փոխարեն հուլիսի 1-ից դառնալով 55 հազար դրամ: | 
