ԹՐԱՄՊԸ ԱՌԱՋԱՐԿԵՑ ԻՊ ԴԵՄ ՊԱՅՔԱՐԸ ԹՈՂՆԵԼ ՌՈՒՍԱՍՏԱՆԻՆ Պ. Ք. Հանրապետականների մեջ ԱՄՆ նախագահության առաջատար թեկնածու Դոնալդ Թրամպը գտնում է, որ իր երկիրը պարտավոր է «Իսլամական պետության» դեմ պայքարը թողնել Ռուսաստանին: Նրա խոսքերով, Սիրիայում «կատարյալ աղետ է ու խառնաշփոթ», իսկ ԱՄՆ-ը նպաստում է այդ խառնաշփոթին: Այդ մասին նա հայտարարել է CNN-ին տված հարցազրույցում: Թրամպն ավելացրել է, որ միաժամանակ «Իսլամական պետության» եւ Բաշար Ասադի վարչակարգի դեմ հանդես գալովՙ ԱՄՆ-ը ԻՊ-ին «խանգարում է որսալ Ասադին»: «Ռուսաստանը հիմա այնտեղ է, Ասադի կողմից է եւ ուզում է ԻՊ-ից ազատվել մեզանից ոչ պակաս չափով, գուցեեւ ավելի շատ, քանի որ չի ուզում ԻՊ-ի ներկայություն Ռուսաստանում: Ինչո՞ւ հարվածենք ԻՊ-ին եւ հետո Ասադին: Թող նրանք (Ասադը եւ ԻՊ-ն) կռվեն իրար դեմ, իսկ մենք կստանանք այն, ինչ կմնա: Բայց ավելի կարեւորն այս է. եթե Ռուսաստանն ուզում է կռվել ԻՊ դեմ, թող կռվի: Թող ռուսները կռվեն Սիրիայում եւ Իրաքում», հայտարարել է Թրամպը: Միլիարդատեր թեկնածուն նաեւ քննադատել է ԱՄՆ հատուկ ծառայությունների կողմից սիրիական զինված ընդդիմության պատրաստության ծրագիրը: «Մենք որեւէ պատկերացում չունենք, թե դրանք ինչ մարդիկ են: Գուցե նրանք Ասադից էլ վատն են: Մենք ինչո՞ւ ենք դրան մասնակցում», ասել է Թրամպը, ավելացնելով, որ ընդհանուր առմամբ «Ասադը ավելի լավ տպավորություն է գործում, քան հակառակ կողմը»: Բացի դրանից, Fox News հեռուստաալիքին տված հարցազրույցում Թրամպը շատ բարձր է գնահատել ՌԴ նախագահի պաշտոնում Պուտինի ծավալած գործունեությունը: «Ինչ վերաբերում է ղեկավարմանը, ես նրան «գերազանց» եմ նշանակում: Մեր նախագահը այնքան էլ լավը չէ», հայտարարել է հանրապետականների թեկնածուն: |
