ԲԱՔՈՒՆ ՆՈՐ ՊԱՏՄԱԲԱՆ Է ԳՏԵԼ Ա. Հ., Գերմանիա «Ապացուցվել է, որ առաջին քրիստոնեական եկեղեցիներն Ադրբեջանում կառուցել են կովկասյան ալբանները: Քրիստոնեությունն այստեղ ալբանական պատմությանն է առնչվում, թեպետ հայերը պնդում են, թե քրիստոնեության տարածման հարցում իրենք են դերակատար, ինչը սխալ է», ծանուցում է ադրբեջանական պետական լրատվական «Ազերթաջ» գործակալության գերմաներեն տարբերակը հուլիսի 20- ի լրատվահոսքումՙ վկայակոչելով նորվեգ գիտնական Բյորն Վեգգեին (Bjorn Wegge): Գաբալայում կայացած «Ալբանական առաքելական եկեղեցու անցյալը եւ ներկան» միջազգային գիտաժողովի մասնակից, Օսլոյի համալսարանի պրոֆեսոր, պատմագիտության դոկտոր, կովկասյան ալբանների պատմության հետազոտող Բյորն Վեգգեն գործակալությանը տված հարցազրույցում պնդել է վերոհիշյալըՙ չմոռանալով գովերգել Ադրբեջանի ներկան: Պարզ էՙ կովկասյան ալբանները մեզ ծանոթ աղվաններն են: Պատմական Աղվանքում գտնվող Շաքին հարուստ է հայկական եկեղեցիներով, միգուցե սա՞ է նկատի ունեցել նորվեգ պատմաբանը, որ «Ազերթաջը» մատուցել է իր սրբագրմամբ եւ հավելումներով: Միգուցե հաջողվի պարզել առաջիկայում: |
