ԱԴՐԲԵՋԱՆԸ ՌԱԶՄԱԿԱՆ ՀԱՆՑԱԳՈՐԾՈՒԹՅՈՒՆ Է ԱՐԵԼ. ՄԵ՛ՆՔ ՉԵՆՔ ԱՍՈՒՄ ՀՈՎԻԿ ԱՖՅԱՆ Մարդու իրավունքների միջազգային ֆեդերացիան /FIDH/ գնահատել է ապրիլի սկզբին հայ-ադրբեջանական սահմանում տեղի ունեցած որոշ գործողությունները եւ արել հետեւյալ պաշտոնական եզրակացությունը. «Վերջին 3 տարում տարածաշրջանի ամենակործանարար հակամարտությունը ղարաբաղյան հակամարտությունն է, որը շարունակում է մարդկային կյանքեր խլել: Այս հակամարտությունը, սակայն, բավարար ուշադրության չի արժանանում միջազգային հանրության կողմից: Կոնկրետ ապրիլի առաջին օրերին եւ առհասարակ խաղաղ բնակիչների ու քաղաքացիական օբյեկտների վրա հարձակումները միջազգային իրավունքի խախտումներ են»: Հարկ է նկատել, որ միջազգային կազմակերպությունը այս առումով առանձնացրել է ադրբեջանցիների կողմից 3 հայ տարեցների սպանությունը եւ նրանց խոշտանգումը, ինչպես նաեւ զինվոր Քյարամ Սլոյանի գլխատումը: Եզրակացության մեջ հատուկ շեշտված է, որ ազգությամբ եզդի Սլոյանիՙ կտրած գլխով լուսանկարը ադրբեջանցիները տեղադրել են սոցցանցերումՙ ներկայացնելով որպես իրենց հաղթանակ: «Այս դեպքերըՙ սպանվածների մարմինների խոշտանգումները, միջազգային մարդասիրական իրավունքի խախտումից զատ նաեւ ռազմական հանցագործություն են», ասված է եզրակացության տեքստում: Այնպես որ կարող ենք հանգիստ դիմել Միջազգային քրեական դատարանՙ ընդդեմ Ադրբեջանի հայցով, մեղադրելով վերջինիս ռազմական հանցագործություների մեջ: Երբ դատարանում հարցնեն, ո՞վ է ասել, որ Ադրբեջանը այդպիսի հանցագործություններ է արել, մենք կհանենք Մարդու իրավունքների միջազգային ֆեդերացիայի այս եզրակացությունը եւ կասենքՙ ոչ մենք: | 
