ԹՈՒՐՔԱԿԱՆ ՆԵՐԽՈՒԺՈՒՄ Մ. Խ. Թուրքերը ներխուժել են Սիրիա եւ գնդակոծում են այն բնակավայրերը, որտեղ նաեւ հայեր են ապրում: Թուրքիայի նախագահ Ռեջեբ Էրդողանը թվիթերյան գրառմամբ է հայտնել, որ թուրքական զորքերը ռազմական գործողություն են սկսել Սիրիայի հյուսիսում, քրդերի կողմից վերահսկվող տարածքում: Գործողության նպատակն է Սիրիայի հյուսիսային շրջաններից դուրս մղել քուրդ աշխարհազորայիններին եւ ստեղծել «անվտանգության գոտի»: Այս իրադրությանն արձագանքել է Հայաստանի վարչապետը կառավարության նիստի սկզբում երեկ նշելով, թե ՀՀ-ն դատապարտում է ներխուժման այս գործողությունը եւ մտահոգություն հայտնել, որ այս գործողությունը կարող է խորացնել Սիրիայում մարդկային ճգնաժամը. «Մենք կոչ ենք անում միջազգային հանրությանը` գործուն միջոցներ ձեռք առնել այդ ապօրինի գործողությունը դադարեցնելու եւ Թուրքիայի սահմանի երկայնքով Սիրիայի քաղաքացիների, այդ թվում` ազգային փոքրամասնությունների ներկայացուցիչների իրավունքները պաշտպանելու ուղղությամբ », ասել է վարչապետը` հավաստիացնելով, որ Հայաստանը կշարունակի Սիրիայում մարդասիրական առաքելության իրականացումը: Սիրիայի հյուսիս-արեւելք Թուրքիայի ռազմական ներխուժումը դատապարտելու մասին հայտարարություն է արել նաեւ Հայաստանի արտգործնախարարությունը` նշելով, որ դա կհանգեցնի տարածաշրջանային անվտանգության հետագա վատթարացման, քաղաքացիական բնակչության շրջանում մարդկային կորուստների, տեղահանվածների մեծ հոսքի եւ ի վերջո մարդկային նոր ճգնաժամի` ինքնության հիմքով մարդու իրավունքների ծանր ու զանգվածային խախտումների անմիջական վտանգով. «Հայաստանը կոչ է անում գործադրել գործուն միջազգային ջանքեր` այս ռազմական ներխուժումը դադարեցնելու, զանգվածային վայրագությունները կանխելու եւ Թուրքիայի սահմանակից Սիրիայի բնակչությանը պաշտպանելու ուղղությամբ», ասված է ԱԳՆ հայտարարության մեջ: Թուրքիայի նպատակներից մեկն է քրդերից ազատել տարածքը եւ այն բնակեցնել միլիոնավոր սիրիացի փախստականներով: BBC-ն, վկայակոչելով Սիրիայի պետական հեռուստաընկերությունը, հայտնել է, թե թուրքական ավիացիան հարվածներ է հասցրել Ռաս Ալ-Այն քաղաքին: Անկարան ռազմական օպերացիան կոչել է «Խաղաղության աղբյուր»: Սիրիայի հյուսիսային այս շրջաններում տեղակայված էին ամերիկյան զորքեր, որոնք Թրամփի հրամանով հարձակման նախօրեին դուրս են բերվել տարածքից` այդպիսով Թուրքիային թույլ տալով հարվածել քրդերին: Հավելենք նաեւ, որ Իրանի բանակն առանց զգուշացնելու իրանաթուրքական սահմանի երկայնքով անմիջապես ռազմական մեծածավալ զորավարժություններ է սկսել, ISNA գործակալության հաղորդմամբ: Իսկ Իրանի նախագահ Հասան Ռոհանին Անկարային կոչ է արել զսպվածություն դրսեւորել եւ ռազմական գործողություններ չծավալել հարեւան Սիրիայի տարածքում: | 
