ՇԱՄԱԽԻԻ ՀԱՅԿԱԿԱՆ ԵԿԵՂԵՑՈՒՆ «ԱԼԲԱՆԱԿԱՆ» ԱՆՁՆԱԳԻՐ Է ՏՐՎՈՒՄ Գ.Գ. Շամախիի եկեղեցին կներառվիՙ Ադրբեջանի մշակույթի նախարարությանն առընթեր Մշակութային ժառանգության պահպանման, զարգացման եւ վերականգնման պետական ծառայության ցանկում: Այս մասին հայտարարել է պետական ծառայության մամուլի քարտուղար Ֆարիզ Հուսեյնովը: Նրա խոսքով, գերատեսչությունը վերջերս հայտնաբերել եւ գրանցել է մինչեւ 1700 նոր հուշարձան: «Այդ հուշարձաններից մեկն է հանդիսանում Շամախիի Մեդրեսե գյուղի եկեղեցին: Ներկայումս հուշարձանը գրանցված է որպես նոր հայտնաբերված: Փաստաթղթերն արդեն ուղարկվել են Ադրբեջանի Գիտությունների ակադեմիա, եւ, նրա եզրակացության համաձայնՙ դա ալբանական եկեղեցի է: Հուշարձանը կվերականգնվի այն բանից հետո, երբ այն կներառվիՙ պետության կողմից պաշտպանվող Ադրբեջանի պատմամշակութային հուշարձանների ցանկում»,- ասել է Հուսեյնովը: Մեր կարծիքով, համենայնդեպս, ավելի լավ է հայկական եկեղեցին «ալբանական» համարել, քան քանդել: |
