ՈՒՍՈՒՄՆԱՍԻՐՈՒԹՅՈՒՆՆԵՐ ՀԱՅԿԱԿԱՆ ՁԵՌԱԳՐԱՅԻՆ ԱՐՎԵՍՏԻ ԲՆԱԳԱՎԱՌՈՒՄ Հ.Ծ. «Միրոր-Սփեքթեյթր» շաբաթաթերթից տեղեկանում ենք, որ Լեյդենի (Նիդերլանդներ) Բրիլ հրատարակչատունը վերջերս լույս է ընծայել դոկտ. Նիրա Սթոունի «Ուսումնասիրություններ հայկական արվեստի բնագավառում» հոդվածների հավաքածուն, որն ընդգրկում է ձեռագրերի եւ կտավների վերատպություններ: Վաղամեռիկ դոկտ. Նիրան կինն է ճանաչված հայագետ Մայքլ Սթոունի , որ խմբագրել է 262 էջանոց հատորը միջին դարերի մասնագետ Ասիա Բերեզնիակի համագործակցությամբ: Գրքի վերջում զետեղված ցուցիչը հեշտացնում է ընթերցողի որոնումները, իսկ օգտագործված գրականության ցանկը նպաստում հետագա ուսումնասիրություններ կատարելուն: «Մասնագետի բծախնդրությամբ կատարված աշխատանքը շատ դեպքերում նոր լույս է սփռում հայկական ավանդական արվեստի գնահատականների վրա: Նա նորովի է մեկնաբանում ինչպես նրբաճաշակ ձեւավորմամբ նկարազարդված ձեռագրերը, այնպես էլ աշխարհիկ թեմաներով կտավները», նշել է Թաֆթս համալսարանի արվեստի պատմության դասախոս Քրիստինա Մարանչին : Իսկ արվեստաբան Աննա Լեյլոյան-Եկմալյանի կարծիքով Նիրան հիացած է եղել հատկապես Կաֆայում (քաղաք Ղրիմում) նկարազարդված «Եգիպտոսի անապատի հայրերը» անունը կրող ձեռագրերով: «Նրա սուր աչքը կարողացել է որսալ ձեռագրերում հայտնված տարօրինակ կերպարանքների խորհրդավոր նշանակությունը: Դրանք մինչ օրս սխալ են մեկնաբանված եղել, կամ անտեսվել են: Նրա ուսումնասիրությունը անգնահատելի ավանդ է: Ափսոս, որ ինքը չտեսավ իր գրքի հրատարակումը», նշել է Լեյլոյան-Եկմալյանը: | 
