ՄԵԾ ԱՂՄՈՒԿ ՈՉՆՉԻՑ. ՎԵՐՋ ՏԱՆՔ ԱՅՍ ԿՈՐԾԱՆԱՐԱՐ ԳՈՐԾԵԼԱՈՃԻՆ ԳՈՀԱՐ ԲՈՏՈՅԱՆ, Մոսկվա Արդեն քանի օր է, ինչ համացանցը բառացիորեն ողողված է ՀՀ Ազգային ժողովի պատգամավոր, «Բարգավաճ Հայաստան» կուսակցության խորհրդի անդամ, ԱԺ մարդու իրավունքների եւ հանրային հարցերի մշտական հանձնաժողովի նախագահ Նաիրա Զոհրաբյանին պախարակող եւ անարգող հարյուրավոր մեկնաբանություններով եւ տեսանյութերով: Առանց այդ էլ ոչ ջերմ ու բարիդրացիական կանոններով ապրող, տարբեր ճամբարների բաժանված հասարակության մեջ գլուխ են բարձրացրել թշնամանքը, ատելությունն ու չարությունը, եւ, թվում է, թե հայոց երկնակամարը ուր որ է կպայթի այս համատարած ատելությունից, եւ մարդիկ համացանցի վիրտուալ տիրույթից դուրս գալով իրական կյանքՙ փողոց, կույր ատելությամբ սրախողխող կանեն միմյանց: Իսկ ի՞նչ է տեղի ունեցել իրականում, վերջնական դատավճիռներ արձակելուց առաջ մեր հազարավոր հայրենակիցները խորացե՞լ են խնդրի էության մեջ: Իսկ հարցը չնչին է ու պարզունակ, ինչպեսՙ մի կաթիլ մեղրի պատմությունը: Ըստ Նաիրա Զոհրաբյանիՙ Սփյուռքում ապրող մի կին իր «մեսենջերին» անձնական վիրավորանքներ է գրել, սեռական բնույթի հայհոյանքներ է տեղացել իր, ընտանիքի եւ աղջկա հասցեինՙ ասելիքը համեմելով չարության եւ անթաքույց ատելության խոսքերով: Վիրավորված ինքնասիրությամբ Զոհրաբյանը ձայնային պատասխան է ուղարկել տիկնոջը, բացառապես եւ միմիայն նրանՙ այդ տիկնոջը, սակայն խախտելով նրա անձնական նամակագրության անձեռնմխելիության իրավունքըՙ ձայնային պատասխանը գողացվել, հանրայնացվել եւ ֆեյսբուքյան տիրույթում ներկայացվել է որպես Սփյուռքի մեր հայրենակիցների հանդեպ անհարգալից վերաբերմունք: Հայաստանի Հանրապետության եւ Սփյուռքի հայրենակիցներին ուղղված իր խոսքում Նաիրա Զոհրաբյանը, ներկայացնելով իրողությունըՙ ներողություն է խնդրում բոլորիցՙ վերահաստատելով, որ ինքը շարունակելու է չհանդուրժել թշնամանքն ու հայհոյանքը, հասարակությունը ատելությամբ սնելու յուրաքանչյուր քայլ, ով էլ դա կանի եւ որտեղ էլ այդ անձը կապրի: Եվ իրոք, մեծ աղմուկ ոչնչից: Իսկ մի՞թե հենց այսօրինակ «մանր ու չնչին» դիպվածները չեն քանդում մեր տունը, հայոց աշխարհը, ինչին սրտատրոփ սպասում է դավադիր հարեւանը: Այո, չարության խոսքը, ատելությունն ու թշնամանքը կազմաքանդում են Հայրենիքը, եւ անկախ նրանից, թե աշխարհի որ ծայրում ենք ապրում, սփյուռքո՞ւմ, թե՞ հայրենիքում, պետք է վերջ տանք այս եղբայրատյաց ու կործանարար գործելաոճին: |
