ԴԻՎԱՆԱԳԻՏԱԿԱՆ ՆՈՐ ՊԱՏԵՀՈՒԹՅՈՒՆՆԵՐ, ՈՐՈՆՑԻՑ ՊԵՏՔ Է ՕԳՏՎԻ ՀԱՅԱՍՏԱՆԸ ՌԱԿ ԱՐԵՎԵԼՅԱՆ Մ. ՆԱՀԱՆԳՆԵՐԻ ԵՎ ԿԱՆԱԴԱՅԻ ՇՐՋԱՆԱՅԻՆ ՎԱՐՉՈՒԹՅՈՒՆ, Բոստոն, 26 հունվարի 2021 Ռամկավար Ազատական կուսակցության Արեւելյան Մ. Նահանգների եւ Կանադայի Շրջանային վարչությունը ողջունում է նախագահ Ջոզեֆ Բայդենի որդեգրած արտաքին քաղաքական ուղեգիծը, որը հիմնված է մարդու իրավունքների վրա եւ միտված է վերահաստատելու Ամերիկայի ավանդական դերը համաշխարհային թատերաբեմում: Հայաստանն ու մասնավորաբար ամերիկահայերը երախտապարտ են նոր իշխանության, որ նպատակադրվել է որդեգրել մի նոր քաղաքականություն Թուրքիայի ավերիչ քաղաքականության նկատմամբ, որը պատերազմներ է հրահրում Կովկասումՙ Ադրբեջանի զինուժի եւ վարձկան ահաբեկիչների միջոցով: Մենք հույսով ենք նաեւ, որ նախագահ Բայդենի իշխանությունը գործադրության է դնելու իր խոստումը ճանաչելու Հայոց ցեղասպանությունըՙ ամբողջացնելով ամերիկյան Սենատի եւ Ներկայացուցիչների պալատի նախաձեռնությունները նույն ուղղությամբ: Այս նոր իրավիճակը առիթ է ընծայում Հայաստանի Հանրապետությանը արժեւորելու իր գլխավոր խնդիրներըՙ հատկապես ամրագրելու Արցախի ազգային կարգավիճակը եւ երաշխավորելու Հայկական պետության անվտանգությունը ռազմական սպառնալիքների դիմաց: Արդ, ներկա պահի հրամայական պահանջն է, որ ՀՀ կառավարությունը զորաշարժի ենթարկի դիվանագիտական իր ողջ ներուժըՙ բացահայտելու եւ գործարկելու իր ամենակենսական հիմնահարցերըՙ ի խնդիր իր վերապրումի եւ ապագայի: ՀՀ կառավարությունը եւ ԱՄՆ-ի հայկական իրավապաշտպան կազմակերպությունները միասին կարող են համակարգել իրենց ներուժը իրականացնելու համար իրենց փայփայած նպատակները: Լիլիթ Մակունցին Մ. Նահանգներում դեսպանի կարգավիճակով պաշտոնի կոչելու վերաբերյալ ՀՀ Ազգային ժողովում շրջող տեղեկությունները մտահոգիչ եւ, իրականություն դառնալու դեպքումՙ սխալ ժամանակ արված նախաձեռնություն է լինելու: Ներկա պահին անհրաժեշտ են այդ եւ նման պաշտոններում ամենափորձառու դիվանագետներ: Հուսով ենք, որ ՀՀ կառավարությունը լիովին կըմբռնի ներկա իրավիճակի լրջությունը եւ դրան համապատասխան իմաստուն քայլերով կընտրի ճիշտ ճանապարհըՙ հաջողության հասնելու համար: | 
