«ԿԱՐՄԻՐ ԱՆԱՊԱՏԻՑ ԴԵՊԻ ԵՐՈՒՍԱՂԵՄ» Հ. Ծ. Վերոնշյալ վերնագրով Եղեռնից մազապուրծ Եղիա Կահվեճյանի լուսանկարներով հարուստ ինքնակենսագրական հատորի շնորհանդեսն է տեղի ունեցել Գլենդեյլում վերջերս: Ուրֆայի հայ բնակչության գոյամարտի, դեպի Դեր Զոր նրանց տարագրության, այնուհետեւ նրանց մի մասի Երուսաղեմում հաստատվելու պատմությունը հայերենով Երեւանում լույս էր տեսել 1995-ին: Այժմ այն անգլերեն է թարգմանվել Եղիայի որդուՙ Հարություն Կահվեճյանի կողմից: Եղիան վարպետ բանջո եւ մանդոլինա նվագող է եղել: Հետագայում նա վարպետ լուսանկարիչ է դարձել: Մանկություն չի տեսել: Փոխարենը ականատես է եղել սպանությունների, մահվան եւ ավերումի տեսարանների, որոնք անջնջելի տպավորություն են թողել նրա վրա: Երեքհարյուր էջանոց հատորն այժմ օտար ընթերցողին է ներկայացնում մարդկության դեմ գործված մեծագույն հանցագործության վավերական պատմությունը, Եղեռնի հարյուրամյակի շեմին հարստացնելով վկայությունների երկար շարքը: | 
