«ՇԻՐԱԿ» ՀՐԱՏԱՐԱԿՉԱՏՈՒՆԸ ԼՈՒՅՍ Է ԸՆԾԱՅԵԼ ԲԱՆԱՍՏԵՂԾ ՊԵՊՈ ՍԻՄՈՆՅԱՆԻ ԲԱՆԱՍՏԵՂԾՈՒԹՅՈՒՆՆԵՐԻ ԵՏՄԱՀՈՒ ԺՈՂՈՎԱԾՈՒՆ. «ԳՄԲԵԹ ԱՐԵԳ» ԽՈՐԱԳՐՈՎ Ե. Խ. Գիրքը բովանդակում է Պեպո Սիմոնյանի այն բանաստեղծությունները, որոնք ընդգծված ազգային խորք եւ բովանդակություն ունեն: Իր կազմությամբ եւ կառուցվածքով գիրքը սովորականից տարբեր, կարելի է ասելՙ անսովոր իրողություն է. բանաստեղծությունների հետ տպագրված են Պեպո Սիմոնյանի նամակներըՙ ուղղված բարոնուհի Քերոլայն Քոքսին եւ բարոնուհու պատասխաններըՙ այդ նամակներին, մի բանաստեղծության անգլերեն թարգմանությունը, երկու բանաստեղծության արաբերեն թարգմանություններ եւ այլն: Գիրքը բացվում է Պեպո Սիմոնյանի մանրամասն կենսագրությամբ: Գիրը կազմողները իբրեւ առաջաբան գրքում զետեղել են Երվանդ Տեր-Խաչատրյանի հեղինակածՙ Պեպո Սիմոնյանի ընդարձակ գրական դիմանկարը, «Անանուն ծառի ձայնը. Պեպո Սիմոնյան» խորագրով, որ տպագրվել է 2013 թվականին «Կամար» հանդեսում (N19): Գրքի կազմը նկարազարդել է սփյուռքահայ տաղանդավոր արվեստագետներից մեկըՙ գեղանկարիչ Հարություն Թորոսյանը : | 
