ՄԱՐԻ ԹԵՐԶՅԱՆԸ ԲԱՐՁՐԱԿԱՐԳ ԳՐՈՂՆԵՐԻ ՇԱՐՔՈՒՄ Հ. Ծ. Գրելաոճի բնագավառում «բարձրակարգ պրոֆեսիոնալ» է ճանաչվել «Continental Who՛s Who-ի» կողմիցՙ ճանաչված գրող, հրապարակախոս եւ բլոգեր Մարի Թերզյանը, հաղորդում է «Արմինյն Միրոր-Սփեքթեյթր» շաբաթաթերթը: Եգիպտոսում ծնված համեստ, մարդասեր մտավորականը փոքր տարիքից տարված է եղել ընթերցանությամբ եւ ցանկանալով մրցել հեղինակների հետ, սկսել եւ շարունակել է գրել արդեն 55 տարի, լույս ընծայելով անգլերեն եւ հայերեն հոդվածներ աշխարհի 18 երկրներում կատարած իր ճամփորդությունների մասին: Հեղինակ է նաեւ մի շարք պատմական հուշագրությունների, որոնցից հիշատակի արժանի են հատկապես «Ներգաղթյալների դուստրը» («The Immigrant՛s Daughter), որն 2006-ին արժանացել է «Լավագույն գիրք» մրցանակին, եւ «Քաղաքականապես անտուն» (Politically Homeless), որն 2016-ին արժանացել է «Գերազանցության» մրցանակի «Նշանավոր կանայք» պարբերականի եւ «Կանանց միջազգային առաջնորդության» ասոցիացիայի կողմից: Մարի Թերզյանը քույրն է հարգարժան մտավորական, հայոց լեզվի անաղարտ պահպաման անխոնջ մարտիկ, ՀԲԸՄ-ի Եգիպտոսի շրջանակային հանձնաժողովի պատվո ատենապետ Պերճ Թերզյանի: Մ. Նահանգներում հաստատվելուց հետո Մարի Թերզյանը համեմատական գրականություն է ուսումնասիրել Նյու Յորքի Կոլումբիա համալսարանում: Այնուհետեւ Կալիֆոռնիայի պետհամալսարանում (Լոս Անջելես) շարունակել է իր ուսումը: Ներկայիս «Ուիթիըր» (Whittier) գրողների ակումբի անդամ է եւ հեղինակային բլոգ է վարում «Authors den.com» սայթում: | 
