ԳԱՐԲՈՅԻ ԲՆԱԿԱՐԱՆԸ ՎԱՃԱՌՎՈՒՄ Է Հ. Ծ. «Ուոլ Սթրիթ Ջոռնըլի» հաղորդմամբ, ազգությամբ շվեդ, ամերիկյան քաղաքացիություն ընդունած, Մամուլյանի «Քրիստինա թագուհին» (1933 թ.), Կյուքորի «Քամելիազարդ տիկինը» (1937 թ.) եւ այլ ֆիլմերի նշանավոր դերասանուհի Գրետա Գարբոյի (1905-1990) Մանհաթենյան կոոպերատիվ բնակարանը, որտեղ դերասանուհին ապրել է 1953-ից մինչեւ իր մահը, վաճառքի է հանվել 5.95 միլիոն դոլարով: Բնակարանը 1927-ին կառուցված 14 հարկանի շենքի 5-րդ հարկում է եւ ունի 3 ննջարան: Մինչեւ վերջերս այնտեղ էին ապրում 84 տարեկանում մահացած դերասանուհու ազգականները, որոնք էլ 1990-ականներին կապիտալ վերանորոգման են ենթարկել բնակարանը, սակայն պահպանել են Գարբոյի դիզայներական որոշ առանձնահատկություններ: «Գարբոն դեռեւս լեգենդար անուն է Հոլիվուդում եւ Նյու Յորքում», ասել է անշարժ գույքի միջնորդներից մեկը: | 
