ՄԽԻԹԱՐՅԱՆՆԵՐԻ ՀԱՅԿԱԿԱՆ ԱՏԼԱՍԸՙ ՌԵԿՈՐԴԱՅԻՆ ԳՆՈՎ Հ. Ծ. Հունիսի 7-ին Նյու Յորքի «Սուոն» պատկերասրահներում տեղի է ունցել հնագույն քարտեզների, ատլասների, գունավոր փորագրանկարների եւ բնապահպանական գրքերի հերթական աճուրդը, որի ընթացքում հայերեն լեզվով աշխարհի առաջին ատլասներից մեկը ավելի քան վեց անգամ ավելի թանկ գնով է վաճառվել (37,500 դոլար), քան նախնական գնահատմամբ 6000 դոլարը, հաղորդում է «Ֆայն Բուքս մեգեզին» (Fine Books Magazine) պարբերականը, այդ գինը համարելով ռեկորդային: Ատլասը 1849-ին Վենետիկի Մխիթարյան միաբանությունում պատրաստել է Հովհաննես ամիրա Տատյանը փորձելով իր հայրենակիցներին ծանոթացնել արեւմտյան գիտական աշխարհը: Ատլասը բաղկացած է զույգ էջերի վրա ձեռքով գունազարդված 10 քարտեզներից, որոնցից մեկը ներկայացնում է արեւային համակարգը: Ատլասը տպագրվել է Փարիզում: Տատյանները (XVIII-XX դդ.) հայ ազգային-հասարակական գործիչների, նշանավոր մտավորականների մեծահարուստ տոհմ են եղել Կոնստանդնուպոլսում: Նյութական միջոցներ են տրամադրել Վենետիկի Մխիթարյաններին: Ազդեցիկ դեր խաղացել Կ. Պոլսի հայ համայնքի կրոնական եւ մշակութային կյանքում: Ինքը, Հովհաննես ամիրա Տատյանը 1844-1851 թվերի ընթացքում տղաների եւ աղջիկների համար դպրոցներ է հիմնել Մաքրի Քյոյում, Նարլի Կապույում, Ազադլիում եւ այլուր: | 
