«ԼՌՈՒԹՅԱՆ ՍՊԻՆԵՐԸ»ՙ ՈՒՈԹԵՐԹԱՈՒՆԻ ՀԱՅԿԱԿԱՆ ԹԱՆԳԱՐԱՆՈՒՄ Հ.Ծ. Ուոթերթաունում տեղակայված Ամերիկայի Հայկական թանգարանի «Ադել եւ Հայկ Տեր-Մանվելյան» պատկերասրահում բացվել է «Լռության սպիները» խորագրով նոր ցուցահանդեսը, որը նոր ղեկավարության նախաձեռնությամբ պետք է նոր շունչ հաղորդի թանգարանին եւ նոր հնարավորություններ բացի նրա առաջ: Հոգաբարձուների վարչության նախագահ Միշել Քոլիգյանի ղեկավարության եւ ստեղծագործական ծառայությունների ու ցուցահանդեսների կազմակերպման նորանշանակ Ջենիֆեր Լիստոն Մանսոնի տնօրենության ներքո վերամշակվել են թանգարանի ծրագրերը, վերադասավորվել ցուցանմուշները եւ արդիականացվել գործող կայքը (www.armenianmuseum.org): Ցուցահանդեսի բաղկացուցիչ մասերից է, ըստ «Արմինյն Միրոր-Սփեքթեյթրի» հաղորդման, Նուբար եւ Էբբի Ալեքսանյանների ֆիլմից մի հատված: «Լռության սպիները» ամերիկահայ հոր եւ իր դստեր ճանապարհորդությունն է դեպի նախնյաց հայրենիքՙ բացահայտելու ժխտողականության խորը հոգեբանական հետեւանքները եւ կորստի ենթագիտակցական ճնշումը, որն արդեն երեք սերունդ հետապնդում է մեզՙ հայերիս: Նոր ցուցահանդեսի ծրագիրը Մանսոնը մտահղացել է դիտելով «Project SAVE-ի»ՙ հայկական լուսանկարչական արխիվների լուսանկարները: Նուբարի հետ համագործակցելով նա որոշում է անցյալի ժառանգությունը կապել ներկային: Ինքնության կորստի չափերի բացահայտումն ու փոխհատուցման պահանջն է ընկած ինչպես ֆիլմի, այնպես էլ ցուցահանդեսի հիմքում: Նուբար Ալեքսանյանը ֆոտոլրագրող է եւ ֆիլմարտադրիչ: Վերջին 40 տարիներին համագործակցել է ամերիկյան եւ եվրոպական պարբերականների հետ, ինչպիսիք են «Life Magazine-ը», «New York Times Magazine-ը», «Fortune-ը», «Geo-ն», «Newsweek-ը» եւ «National Geographic-ը»: 2006-ից իր կինոընկերությունը կարճամետրաժ վավերագրական ֆիլմեր է արտադրում: Էբբին սոցիալական հարցերի խորհրդատու է Բոստոնում: Մանսոնը 2001-ից կազմակերպել է ավելի քան 70 ցուցահանդեսներ: | 
