ԱՌԱՋԻՆ «ԽՈՍՏՈՒՄ» ՄՐՑԱՆԱԿԸՙ ՔՐԻՍ ԿՈՌՆԵԼԻՆ Հ. Ծ. Մարդու իրավունքների պաշտպանՙ «Human Rights Watch» ընկերության Լոս Անջելեսի հանձնախումբը նոյեմբերի 14-ին Բեվերլի Հիլթոն հյուրանոցում կայացած միջոցառման ժամանակ նորաստեղծ «Խոստում» մրցանակը շնորհել է վաղամեռիկ երգիչ եւ երգահան Քրիս Կոռնելին, ով գրել եւ կատարել էր Հայոց ցեղասպանության մասին պատմող «Խոստումը» ֆիլմի գլխավոր երգը, որ կոչ է անում հաստատակամության եւ խիզախությանՙ առանց հուսահատության: Մրցանակը նախատեսվում է շնորհել աչքի ընկնող երգի, հեռուստատեսային շոու ծրագրի կամ ֆիլմի, որն արդարության եւ հավասարության արժեքներն է գովերգում արտակարգ հնչեղությամբ եւ ինքնուրույն ձեւաչափով: Միջոցառմանը ներկա են եղել Թերի Ջորջը, Էրիկ Իսրայելյանը, Սերժ Թանգյանը, Անժելա Սարաֆյանը, Քիմբերլի Մարտո Էմերսոնը, Դեյվիդ Ֆոստերը, Քեթրին Մկֆին, Մայք Մեդավոյը եւ Լինդա Ռամոնը: Կոռնելի մրցանակը հանձնվել է կնոջըՙ Վիքի Կոռնելին, որին ուղեկցել են ամուսնու նվագախմբի անդամներից Քիմ Թայիլը եւ Մեթ Կամերոնը: «Հպարտ ենք «Խոստում» մրցանակը առաջին անգամ շնորհել Քրիս Կոռնելին իր ներշնչող հիանալի երգի համար», նշել է HRW-ի Լոս Անջելեսյան հանձնախմբի տնօրեն Ջաստին Կոնոլին: Միջոցառման ավարտին Գրեմմի մրցանակի հավակնորդ, OneRepublic նվագախմբի գլխավոր երգահան Ռայան Թեդրնը Դրու Բրաունի ուղեկցությամբ կատարել է «Խոստումը» երգը, որն արժանացել է ներկաների հոտնկայս ծափահարություններին: | 
