ՄՆՋԱԽԱՂԻ ԹԱՏՐՈՆԸՙ ՀԱՍՏԱՏՎԱԾ ՀԱՍՑԵՈՎ ՆԱԻՐ ՅԱՆ 2017-ի փետրվարին մշակույթի նախարար Արմեն Ամիրյանն անակնկալ մատուցեց թե՛ գրապալատի աշխատողներին, թե՛ մնջախաղի թատրոնի ղեկավարին ու դերասաններին: Նա հայտարարեց, որ գրապալատի տարածքը տրամադրելու է մնջախաղի թատրոնին. մնջախաղացները ցնծացին խանդավառությունից, գրապալատցիները բողոքի աղմուկ բարձրացրին: Ի վերջո, բանավոր հայտարարությունը գրավոր որոշում դարձավ. գրապալատը միացվեց Հայաստանի ազգային գրադարանին, ու տարածքն ազատվեց թատրոնի համար: Թե՛ առաջին, թե՛ երկրորդ հայացքից պարզ էր, որ գրապալատի կիսավեր, մաշված ու անխնամ տարածքը թատրոնի պահանջներին համապատասխանեցնելու եւ հարամարեցնելու համար շինարարական ձեւափոխումներ ու լուրջ նախագիծ է պետք: Անցավ ուղիղ մեկ տարի: 3 օր առաջ Արմեն Ամիրյանը քաղաքաշինության պետական կոմիտեի պաշտոնյայի հետ մնջախաղի թատրոնի ղեկարավ Ժիրայր Դադասյանին ներկայացրեց թատրոնի շենքի հաստատված նախագիծը: Իհարկե, Դադասյանը եւս մասնակցել է նախագծման աշխատանքներին. ի վերջո, իր ղեկավարած թատրոնն է տեղակայվելու նախկին գրապալատի շենքում, եւ հարկ է, որ պայմանները համապատասխանեն թատրոնի չափանիշներին: Նախագիծը ճարտարապետ Խաչատուր Գրիգորյանինն է, սակայն համատեղ աշխատել է մասնագիտական խումբՙ Սաշուր Քալաշյան , Մկրտիչ Մինասյան , Հրաչ Պողոսյան , Նարեկ Սարգսյան : Նախագիծը գոհացնում է Ժիրայր Դադասյանին: Գեւորգ Քոչար 21 հասցեի առաջին երկու հարկերն այլ սեփականատերեր ունեն. դատելով շենքի արտաքին տեսքիցՙ ջարդված պատուհաններ, անխնամ, պատեր, երկու հարկերն էլ վաղուցվանից չեն գործածվում: Իսկ 3-րդ հարկը, որտեղ տեղակայված կլինի մնջախաղի թատրոնը, մի փոքր կբարձրացվի, որպեսզի ըստ բեմի պահանջների, թատրոնն ունենա բարձր առաստաղ: Տարածքը 1000 քմ. է: Թատրոնը կունենա առանձին մուտք, վերելակ, համապատասխան կահավորանք, վարչական հատված, դահլիճ, բեմ, հարդարասենյակներ, մի խոսքովՙ այն, ինչ անհրաժեշտ է ժամանակակից թատրոնին: Ավելինՙ այն հավակնում է դառնալ մշակութային բազմանպատակ կենտրոն: Շենքի վրա կտեղադրվի մեծ լեդ-էկրան: Մնջախաղի թատրոնի շինարարական աշխատանքները կսկսվեն մայիսին. շուտով կհայտարարվի մրցույթ ու պարզ կդառնա, թե ով է մրցույթը շահած շինկազմակերպությունը: 2019-ի մայիսին մնջախաղի թատրոնն իր 45 ամյակը կնշի սեփական հարկի տակՙ նոր ներկայացումով: Ընդհանուր նախագիծն արժե 250 միլիոն դրամ. 60 միլիոնի աշխատանք նախատեսվում է կատարել այս տարի, իսկ մնացած 190 միլիոնինըՙ 2019-ին: Նախահաշիվը վերջնական չէ. շինաշխատանքների ընթացքը ցույց կտաՙ նոր ներդրումների կարիք կլինի՞, թե ոչ: Մոտ ժամանակներս կհայտարարվի նաեւ Համազգային թատրոնի շենքին տարածք հատկացնելու որոշման մասին: Ըստ նախնական տեղեկություններիՙ Համազգայինի նոր շենքը լինելու է թատրոնի եւ կինոյի պետական ինստիտուտից հարեւանությամբ: |
