ՀԱՅ ՊԱՐՈՒՀՈՒ ՓԱՅԼՈՒՆ ԵԼՈՒՅԹԸ «ՄԱՍԴԱՆՍԱՅՈՒՄ» Ա. Բ. Կանարյան կղզիների «Մասդանսա» ժամանակակից պարի միջազգային աշխարհահռչակ փառատոնն այս տարի կայացավ 23-րդ անգամ: 400-ից ավել հայտերից ընտրվել է ութ արտիստ, որոնք ներկայացնում են Հարավային Կորեան, Գերմանիան, Իտալիան, Իսպանիան, ԱՄՆ-ը եւ Հայաստանը: Մեր երկիրը ներկայացնում էր պարուհի եւ պարադիր Ռիմա Պիպոյանը , որի «Կինը որոշում կայացնելուց առաջ» մոնոներկայացումը բուռն ընդունելության է արժանացել, երիտասարդ արվեստագիտուհուն հրավիրել են հյուրախաղերի եւ հաջորդ տարի Կանարներում բեմադրելու, դասավանդելու եւ ելույթներ ունենալու: Ի դեպ, մամլո ասուլիսին Պիպոյանին, ի թիվս բազմաթիվ հարցերի, հարցրել են նաեւ. «Արդյո՞ք Հայաստանում տեղյակ են այս աշխարհահռչակ մրցույթի մասին, որտեղ ժամանակին շատ հայտնի խորեոգրաֆներ են մասնակցել»: Անշուշտ, տեղյակ չեն, եւ մեծ մասամբ չգիտեն էլ մեր քաղաքում ապրող ու ստեղծագործող ժամանակակից պարի այս տաղանդավոր նվիրյալի մասին, որը Հայաստանը բազմիցս ներկայացրել է միջազգային հեղինակավոր ասպարեզներում: Միայն այս տարի նրա «Բարեւ, Քիթի» մոնոներկայացումը ներկայացվել է Հայաստանում, Խորվաթիայում եւ Իտալիայում, իսկ «Կինը որոշում կայացնելուց առաջ» բեմադրությունըՙ Գերմանիայում, Հունաստանում, Իտալիայում, Լեհաստանում, Պորտուգալիայում եւ վերջապեսՙ Իսպանիայում: Մեր շնորհավորանքնե՛րը: |
