ԻՎԱՆ ԱՆՏՈՆՅԱՆԻ ՍԽՐԱՆՔԸ Մարտի 20-ին «Նարեկացի» արվեստի միությունում տեղի ունեցավ ռեժիսոր Իվան Անտոնյանի հեղինակային «Լոռու արվեստագետներ» խորագիրը կրող ֆիլմաշարի «Գարուն է եկել» ֆիլմի ցուցադրությունը: Ֆիլմը ներկայացնում էր Հայաստանի նկարիչների միության Լոռու մարզային բաժանմունքի քարտուղար, գեղանկարիչ Սամվել Խառատյանի ստեղծագործ աշխարհըՙ հարուստ գունապնակով: Ֆիլմի օպերատորն է Ժորա Վարդանյանը , մոնտաժողըՙ Գագիկ Հովհաննիսյանը , սցենարի հեղինակն է Իվան Անտոնյանը : Ֆիլմի ցուցադրությունից հետո տեղի ունեցավ մտքերի աշխույժ փոխանակություն: Այն սկսվեց վանաձորցի երիտասարդ արտիստուհի Հրաչուհի Լոռեցյանի խոսքով, այնուհետեւ խոսքը փոխանցվեց ֆիլմի հեղինակ եւ ռեժիսոր Իվան Անտոնյանին, ով իր խոսքում համառոտ ներկայացրեց ֆիլմաշարի անցած ուղին: Ողջույնի խոսք ասացին ՀՀ վաստակավոր լրագրող Ֆահրադ Ափուջանյանը , ՀՀ ժողովրդական արտիստներ Ռուբեն Մաթեւոսյանը , Ռաֆայել Քոթանջյանը , Թովմաս Պողոսյանը , «Կինո+» հանդեսի գլխավոր խմբագիր Ռոբերտ Մաթոսյանը , «Ակօս» (Ստամբուլ) թերթի հայաստանյան թղթակից Ծովինար Լոքմագյոզյանը , Լոռու մարզպետարանի ԿՄՍԵ վարչության առաջատար մասնագետ Մհեր Մելիքյանը : Նրանք իրենց խոսքում բարձր գնահատեցին ֆիլմաշարի ստեղագործական խմբի գործունեությունը, դրվատանքի խոսքեր ասացին նրանց եւ գեղանկարիչ Սամվել Խառատյանի հասցեին: Իսկ Ֆահրադ Ափուջանյանն իր խոսքում ստեղծագործական խմբի աշխատանքը որակեց որպես սխրանք: |
