ԱԶՆԱՎՈՒՐԻ ԴԻԼԻՋԱՆՅԱՆ ԿՐԹԱԹՈՇԱԿԸՙ ԿԱՆԱԴԱՀԱՅԻՆ Հ.Ծ. Մեկ տարի առաջ, «Ավրորա» մարդասիրական նախաձեռնության ստեղծած Շառլ Ազնավուրի անվան կրթաթոշակը որոշվել է առաջին անգամ շնորհել 17-ամյա կանադահայ Արմեն Երզնկացյանին: Դա հնարավորություն է տալու նրան ուսումը շարունակելու Դիլիջանի միջազգային գիշերօթիկ քոլեջում: Արմենը ծնվել է Մոնրեալում: Հետաքրքրասեր, նպատակասլաց, գիտության (հատկապես կենսաբանության) եւ երաժշտության հանդեպ կրքոտ վերաբերմունք ունեցող անձնավորություն է, որ 2018-ի աշնանն էր դիմել համայնքային հանձնախմբինՙ առաջարկելով իր թեկնածությունը: Նա նաեւ ակտիվ հասարակական գործունեություն է ծավալում համայնքում, աշխատում է հիվանդանոցում, Կանաչների կոոպերատիվի անդամ է եւ ֆրանսերեն ու մաթեմատիկա է ուսուցանում փոքր դասարանցիներին: «Աներեւակայելի էր: Հնարավոր չէ պատկերացնել, թե ինչ զգացի, երբ հայտնեցին, որ արժանացել եմ այդ մեծ հայի, մեծ մարդու կրթաթոշակին: Շատ եմ սիրում լսել նրա երաժշտությունն ու երգերը: Շնորհակալ եմ «Ավրորային» եւ «Ազնավուր հիմնադրամին», այդ հնարավորությունը ինձ ընձեռելու համար: Նաեւ Հայաստան, իմ արմատներին վերադառնալու հնարավորության համար», նշել է Արմենը: «Ոգեւորված ենք, որ արդեն ունենք կրթաթոշակի առաջին թեկնածուին: Հայրս առաջին օրից «Ավրորա» նախաձեռնության կողմնակիցն էր եղել: Նրա անունով հիմնված կրթաթոշակը ծառայելու է իրականացնելու խիզախ երիտասարդների երազանքը բարձրորակ կրթություն ստանալու: Մենք հավատում ենք կրթության պարգեւած ուժին: Սահմանել էինք որոշակի չափանիշներ եւ մանրազնին ուսումնասիրությունից հետո ընտրեցինք Արմեն Երզնկացյանին որպես Ազնավուրի անվան կրթաթոշակի առաջին արժանավորին», ասել է Նիկոլաս Ազնավուրը: | 
