ՅԱՆՆԻՆ ՇՈՒՏՈՎ ՀԱՅԱՍՏԱՆՈՒՄ ՄԱՆԱՆԱ ՀՈՎԱԿԻՄՅԱՆ Յաննին երկրորդ անգամ համերգային ծրագրով հանդես կգա Հայաստանում: «Ազգի» հետ զրույցում համերգի պրոդյուսեր Արման Ծատուրյանն ասաց, քանի որ Յաննին շատ են սիրում Հայաստանում, այդ իսկ պատճառով որոշել են երկրորդ անգամ համերգ կազմակերպել. «Վստահ եմ, որ Յաննիի համերգին դահլիճը լեփ-լեցուն կլինի, քանի որ նոր ծրագրով է հանդես գալու, չնայած հայտնի հիթեր եւս կհնչեն»: Համերգը տեղի է ունենալու երկու օր` ապրիլի 20-ին եւ 21-ին Կարեն Դեմիրճյանի անվան մարզահամերգային համալիրում: «Յաննին շատ է սիրել Հայաստանը: 2011թ. մենք շատ ջերմ ընդունելություն կազմակերպեցինք եւ կատարեցինք նաեւ իր մի շարք ցանկությունները, որոնք պայմանագրում նշված չէին»,- ասաց Ա. Ծատուրյանը եւ ավելացրեց. «Յաննին, ի տարբերություն մի շարք աստղերի, աստղային հիվանդությամբ չի տառապում եւ իր հետ աշխատելը շատ հեշտ է»: Բացելով չակերտները, Արման Ծատուրյանն «Ազգին» ասաց, որ ցանկություն կա, որպեսզի Յանիի հետ հայ տեղական աստղերից Կամո Սեյրանյանը դուդուկով ինչ-որ ստեղծագործություն համատեղ կատարի եւ այժմ սպասում են Յաննիի որոշմանը: Համերգի տոմսերը կարժենան 5 000 - 80 000 դրամ: Ա. Ծատուրյանը նշեց, որ միջոցառումների ղեկավարման իր քաղաքականությունն է չընկնել գերշահույթի հետեւից. «Մենք տոմսերի գները միշտ լիբերալ ենք դնում, որպեսզի հասանելի լինի հանդիսականի համար եւ գործընթացը շարունակական լինի»: Համերգի պրոդյուսերն ընդգծեց, որ իրենք համերգային ծրագրերը միայն Հայաստանի համար չեն կազմակերպում. «Մենք ունենք հարեւաններ, օրինակՙ Պարսկաստանը, եւ Յաննիի համերգը գովազդվում է նաեւ այնտեղ»: | 
