ԱՌԱՋԱՏԱՐՆԵՐՆ ԱՄՐԱՊՆԴԵՑԻՆ ԴԻՐՔԵՐԸ Ֆուտբոլի աշխարհի առաջնության ընտրական մրցաշարում կայացան հերթական հանդիպումները: B խմբում, որտեղ հանդես է գալիս Հայաստանի հավաքականը, հերթական հաղթանակը տոնեց Իտալիայի ընտրանին, որը Մարիո Բալոտելիի խփած 2 գոլերի շնորհիվ հյուրընկալվելիս հաղթեց Մալթայի հավաքականին: Բալոտելին հաշիվը բացեց 11 մ հարվածով: Մալթայի հավաքականը կարող էր պատասխան գոլը խփել, սակայն Միֆսուդին չհաջողվեց դիպուկ իրացնել 11 մ հարվածը: Հաջող խաղաց Ջանլուիջի Բուֆոնը: Իտալացիները 13 միավորով վստահորեն գլխավորում են աղյուսակը: Չեխերի նկատմամբ հյուրընկալվելիս 3-0 հաշվով հաղթանակ տոնելուց հետո Դանիայի ընտրանին սեփական հարկի տակ չկարողացավ առավելության հասնել բուլղարացիների նկատմամբ: Դանիան հայտնվել էր պարտության վտանգի առաջ, երբ 51-րդ րոպեին Մանոլեւը բացել էր հաշիվը: Միայն 11 մ հարվածի շնորհիվ, որն իրացրեց Ագերը, դանիացիները խուսափեցին պարտությունից: A խմբի առաջատարներ Բելգիայի եւ Խորվաթիայի հավաքականները հերթական հաղթանակները տոնելով, ավելի ամրապնդեցին իրենց դիրքերը: Նրանք վաստակել են 16-ական միավոր եւ 9-ով առաջ են անցել 3-րդ տեղում ընթացող սերբերից, որոնք հաղթեցին շոտլանդացիներին (2-0): Բելգիացիները սեփական հարկի տակ առավելության հասան մակեդոնացիների նկատմամբ (1-0), իսկ խորվաթները հյուրընկալվելիս 2-1 հաշվով հաղթեցին Ուելսի ընտրանուն: C խմբի առաջատար Գերմանիայի ընտրանին էլ եզրափակիչի ուղեգիր նվաճելու լուրջ հայտ է ներկայացրել: 4-1 հաշվով հաղթելով ղազախներին, գերմանացիները 16 միավորով գլխավորում են աղյուսակը: 2-րդ տեղում ընթացող Ավստրիայի հավաքականն Իռլանդիայում խաղն ավարտեց ոչ-ոքի (2-2) եւ վաստակեց 8 միավոր: D խմբում հաղթարշավը շարունակեց Հոլանդիայի հավաքականըՙ տոնելով 6-րդ անընդմեջ հաղթանակը: Հոլանդացիները 4-0 հաշվով ջախջախեցին ռումինացիներին: 11 միավորով 2-րդ տեղում ընթացող հունգարացիները Թուրքիայում ոչ-ոքի (1-1) խաղացին տանտերերի հետ: Էստոնիայի հավաքականը 2 անպատասխան գնդակ խփեց անդորրացիների դարպասը: F խմբում Պորտուգալիայի հավաքականն առանց Քրիշտիանու Ռոնալդուի Բաքվում 2-0 հաշվով հաղթեց ադրբեջանցիներին ու վաստակեց 11 միավոր: Իսրայելի ընտրանին էլ հյուրընկալվելիս պարտության մատնելով Հս. Իռլանդիայի հավաքականին (2-0), նույնպես ունի 11 միավոր: Իսկ առաջատարը 12 միավորով Ռուսաստանի ընտրանին է, որը 2 խաղ պակաս է անցկացրել: H խմբում ուշադրության կենտրոնում էր Չեռնոգորիայի եւ Անգլիայի հավաքականների մրցավեճը, որն ավարտվեց ոչ-ոքի (1-1): Չեռնոգորիան 14 միավորով պահպանեց առաջատարի դիրքըՙ 2 միավորով գերազանցելով անգլիացիներին: Խմբի մյուս խաղերում գրանցվեցին այսպիսի արդյունքներ. Ուկրաինա-Մոլդովաՙ 2-1, Լեհաստան-Սան Մարինոՙ 5-0: I խմբում առաջատարի դերը կրկին ստանձնեց Իսպանիայի հավաքականը, որը հյուրընկալվելիս Պեդրո Ռոդրիգեսի խփած միակ գոլի շնորհիվ հաղթեց ֆրանսիացիներին ու վաստակեց 11 միավոր: Մեկ միավոր պակաս ունի Ֆրանսիայի հավաքականը: Մրցաշարային աղյուսակ B խումբ | | Խ | Հ | Ո | Պ | Գ | Մ | | 1. Իտալիա | 5 | 4 | 1 | 0 | 12-4 | 13 | | 2. Բուլղարիա | 6 | 2 | 4 | 0 | 11-4 | 10 | | 3. Չեխիա | 5 | 2 | 2 | 1 | 6-4 | 8 | | 4. Դանիա | 5 | 1 | 3 | 1 | 6-5 | 6 | | 5. Հայաստան | 4 | 1 | 0 | 3 | 2-7 | 3 | | 6. Մալթա | 5 | 0 | 0 | 5 | 1-14 | 0 |
| 
