ՆՈԵԼ ԳԵՎՈՐԸ ԵՐԱԶՈՒՄ Է ԱՇԽԱՐՀԻ ԲԱՑԱՐՁԱԿ ՉԵՄՊԻՈՆ ԴԱՌՆԱԼ Երեկ «Տեսակետ» մամուլի ակումբում հյուրընկալվել էր գերմանահայ պրոֆեսիոնալ բռնցքամարտիկ Նոել Գեւորը: Նրա իսկական անուն-ազգանունը Նորայր Միքայելյան է: Հանդիպմանը ներկա մարզական մեկնաբան Վարդան Թադեւոսյանը նշեց, որ Գերմանիայում ներկա է գտնվել հայ բռնցքամարտիկի անցկացրած մի քանի մենամարտերին ու նրա մասին տեսանյութ է պատրաստել: Ըստ Թադեւոսյանի, գերմանական մամուլն անդրադառնալով Գերմանիայում բնակվող հայ պրոֆեսիոնալ բռնցքամարտիկներին, Դավիթ Գրաֆից հետո Նոելին համարել է եւս մեկ հայ ծագող «աստղ» ու կարծիք է հայտնել, որ տարիներ հետո մինչեւ 90 կգ քաշային կարգում հայերն ուժեղագույնը կլինեն աշխարհում: Նոելը ծնվել է Երեւանում: 4 տարեկանում մոր եւ կրտսեր եղբորՙ Աբելի հետ մեկնել է Գերմանիա: Այնտեղ Նոելի մայրը ծանոթացել է հայ պրոֆեսիոնալ բռնցքամարտիկ Խորեն Գեւորի հետ եւ ամուսնացել է: «Խորեն Գեւորն ինձ եւ եղբորս հարազատի պես ընդունեց, զբաղվեց մեր դաստիարակությամբ: Նա է մեզ ծանոթացրել բռնցքամարտին, մարզել: 12 տարեկանից սկսեցի զբաղվել սիրողական բռնցքամարտով, իսկ վերջին 2 տարիներին արդեն անցել եմ պրոֆեսիոնալների շարքը: Պրոֆեսիոնալ ռինգում անցկացրած 7 մենամարտերում էլ հաղթել եմ, որից 5-ըՙ նոկաուտով: Ծանոթ եմ Գերմանիայում մարզվող մյուս հայ բռնցքամարտիկներին: Բոլորով հպարտանում եմ, քանի որ Գերմանիայում հայ բռնցքամարտիկները մեծ հաջողություններ են գրանցում», նշեց Նոել Գեւորը: 22-ամյա հայ բռնցքամարտիկը ծրագրել է մայիսին եւ հունիսին 2 մենամարտ անցկացնել: Նա նպատակ ունի այս տարի որեւէ տիտղոսային մենամարտ անցկացնել: Իսկ Նոելի նվիրական երազանքը քաշային իր կարգում աշխարհի բացարձակ չեմպիոնի տիտղոսի նվաճումն է: Այդ ժամանակ արդեն նա քայլեր կձեռնարկի Հայաստանի դրոշի ներքո հանդես գալու համար: Նա նշեց, որ եթե որեւէ մեկն իրեն նման հնարավորություն ընձեռի, ապա մեծ սիրով Հայաստանը կներկայացնի պրոֆեսիոնալ ռինգում: Չնայած այժմ էլ հայ բռնցքամարտիկը ռինգ է դուրս գալիս Հայաստանի դրոշով, իսկ նրա համազգեստի վրա պատկերված է իր հայրենիքի զինանշանը: Նոել Գեւորը Հայաստան է ժամանել հանգստանալու նպատակով: Վերջին անգամ նա Երեւան էր եկել 12 տարի առաջ: Ըստ նրա, քաղաքը շատ է փոխվել, ավելի է գեղեցկացել: Այստեղ հայ բռնցքամարտիկն իրեն լավ է զգում, նույնիսկ տոմսը վերադարձրել է ու մեկ շաբաթով հետաձգել է թռիչքը, որպեսզի կարոտն առնի հայրենիքից: Իսկ Երեւանից հեռանալու պատճառը սոցիալական ծանր պայմաններն էին: Ժամանակին նրանց ընտանիքը բնակվել է Աբովյան փողոցում: Նոելը շատ է սիրում հայկական խորովածն ու ընկույզի մուրաբան: Պրոֆեսիոնալ ռինգը միշտ ձգել է Նոելին: Նա երախտապարտ է Խորեն Գեւորին մարզաձեւում հասած հաջողությունների համար: Նա դիտել է Արթուր Աբրահամի եւ Ռոբերտ Շտիգլիցի միջեւ կայացած վերջին մենամարտը ու ցավում է հայ բռնցքամարտիկի կրած ցավալի պարտության համար: Սակայն պետք է հասկանալ, որ բռնցքամարտում ամեն ինչ էլ պատահում է ու ոչ մեկն ապահովագրված չէ ո՛չ վնասվածքներից, ո՛չ էլ պարտություններից: Կարեւորը, որ միշտ հաղթական ոգին պահպանվի: | 
