«ՔԱՂԱՔԸ ՄԵՐՆ Է` ԲՈԼՈՐԻՆՍ» Գ. Մ. Անցյալ տարվա մայիսին Գյումրիում ստեղծված «Քաղաքը մերն է» քաղաքացիական նախաձեռնության ակտիվիստներից յոթը ՏԻՄ սեպտեմբերյան ընտրություններում ավագանու անդամության թեկնածուներ առաջադրվեցին եւ հանդես եկան միասնական թիմով ու ծրագրով: Դա մեզանում քաղաքացիական նոր մշակույթի ձեւավորման քայլ էր, որն ակախ նշված ընտրության արդյունքներից, ընդհանուր հետաքրքրություն է ներկայացնում իր այդ եւ այլ դրսեւորումներով: Սախարովի անվան հայկական իրավապաշտպան կենտրոնի Շիրակի մասնաճյուղի նախաձեռնությամբ հրատարակված «Քաղաքը մերն է` բոլորինս» գիրքը, որի շնորհանդեսը Շիրակի թեմի սոցիալ-կրթական կենտրոնում տեղի ունեցավ անցյալ շաբաթվա վերջին, ներկայացնում է նախաձեռնության ստեղծած փաստաթղթերը եւ այլ առավել բնութագրական հրապարակումներ` նվիրված քաղաքացիական այդ նոր մշակույթի ձեւավորման եւ իրացման, տեղական ինքնակառավարման բարելավման խնդիրներին: Գրքույկում տեղ են գտել, մասնավորապես, «Քաղաքը մերն է» քաղաքացիական նախաձեռնության հռչակագիրը, Գյումրու ավագանու անդամության թեկնածուի եւ ավագանու անդամի իրենց ընդունած վարքականոնը, որը Հայաստանում առաջին անգամ բարոյական սկզբունքներ է սահմանում համայնքային իշխանության կարեւոր հաստատության` ավագանու անդամի համար, Գյումրու զարգացման իրենց մշակած ծրագրի համառոտ տարբերակը: Վերջինս նաեւ նախաձեռնությունից ավագանու անդամության թեկնածուների միասնական նախընտրական ծրագիրն էր եւ, հրատարակությունը նախաձեռնողների կարծիքով, յուրօրինակ ուղեցույց կարող է լինել համայնքի զարգացման ծրագիր գրելու համար` հաշվի առնելով համայնքների բազմաթիվ ընդհանուր հիմնախնդիրների առկայությունը: Գյումրու «Դպիր» հրատարակչությունում լույս ընծայված գիրքը հասցեագրված է քաղաքացիական կառույցներին, ՏԻՄ-երին եւ ընթերցողների լայն շրջանակին: |
