ՍՅՈՒՆԻՔԻ ՄԱՐԶՊԵՏԻ ՈՐԴԻՆ ԵՎ ԹԻԿՆԱՊԱՀԸ ԿԱԼԱՆԱՎՈՐՎԵԼ ԵՆ Հ. Հ. Գնդապետ, ԼՂՀ զորամասերից մեկի հրամանատար Արտակ Բուդաղյանի վիճակը շարունակում է մնալ ծանր: Զինվորական հոսպիտալի բժիշկները նրա առողջական վիճակում գրեթե փոփոխություն չեն նկատում եւ չեն բացառում երրորդ վիրահատական միջամտության հավանականությունը: Միեւնույն ժամանակՙ ՀՀ ՊՆ քննչական ծառայության ՀԿԳ քննչական բաժնում ձեւավորված քննչական խմբի ղեկավարը Զարզանդ Նիկողոսյանին եւ Տիգրան Խաչատրյանին մեղադրանք է առաջադրել ՀՀ ՔՕ 104-րդ հոդվածի 2-րդ մասի 6-րդ կետիՙ սպանությունըՙ շատերի կյանքի համար վտանգավոր եղանակով, 235 հոդվածի 1-ինՙ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, եւ 112 հոդվածի 1-ին մասերովՙ դիտավորությամբ առողջության ծանր վնաս պատճառելու հատկանիշներով: ՊՆ քննչական ծառայության հասարակայնության հետ կապերի վարչությունից «Ազգ»-ին տեղեկացրին, որ ներկայացվել են միջնորդություններ Սյունիքի մարզի ընդհանուր իրավասության դատարան Նիկողոսյանի եւ Խաչատրյանի նկատմամբ կալանավորումը որպես խափանման միջոց ընտրելու մասին: Դատարանը բավարարել է ներկայացված միջնորդությունը: Սյունիքի մարզպետի որդու եւ թիկնապահի համար պաշտպանները ներկայացրել են գրավի միջնորդություն, սակայն դատարանը մերժել է: Տիգրան Խաչատրյանի եւ Զարզանդ Նիկողոսյանի նկատմամբ որպես խափանման միջոց ընտրվել է երկամսյա կալանքն, ու նրանց տեղափոխել են Երեւանի «Նուբարաշեն» քրեակատարողական հիմնարկ: «Ազգ»-ը նախորդ համարում արդեն տեղեկացրել է, որ հունիսի 1-ին Գորիսում Սյունիքի մարզպետ Սուրեն Խաչատրյանի տան մոտ տեղի է ունեցել վիճաբանություն, ինչն ավարտվել է կրակոցներով: Գորիսի նախկին քաղաքապետ Ավետիք Բուդաղյանը մահացել է, իսկ նրա եղբայրըՙ ՊՆ գնդապետ Արտակ Բուդաղյանը հրազենային ծանր վնասվածքներով տեղափոխվել է զինվորական հոսպիտալ: Կրակոցների ժամանակ վիրավորվել է նաեւ Սուրեն Խաչատրյանի թիկնապահ Նիկոլայ Աբրահամյանը, որը բուժումը ստանում է «Էրեբունի» բժշկական կենտրոնում: | 
