ՍՏՈՐԱԳՐԱՀԱՎԱՔ ԹՈՒՐՔԻԱՅՈՒՄ` Ի ՊԱՇՏՊԱՆՈՒԹՅՈՒՆ ՀԱՅԿԱԿԱՆ ՏՆԵՐԻ Պատմական հայկական տների ոչնչացումը Մուշում կանխելու նպատակով Թուրքիայում սկսվել է էլեկտրոնային ստորագրահավաք: Այս մասին հաղորդում է «Արմենպրեսը»` օգտվելով թուրքական imzakampanyam.com կայքում տեղ գտած հաղորդագրությունից, որում ասվում է` այսօր Թուրքիայում հաշվեհարդար են տեսնում բոլոր այն հնագույն ազգերի հետ, ազգերի, որոնց հարցերը մնացին չլուծված 1915-ից հետո: «Հայերը, հույները, ասորիները համակարգված կերպով կոտորածի են ենթարկվում: 1915 թվականի ցեղասպանությամբ սկսված գործընթացն այսօր շարունակվում է որպես մշակութային ու տնտեսական ցեղասպանություն», նշվում է հաղորդագրության մեջ: Ստորագրահավաքի կազմակերպիչներն իրենց բողոքի ձայնն են բարձրացրել այն փաստի կապակցությամբ, որ Մուշում իշխող «Արդարություն ու բարգավաճում» կուսակցությունը հայկական պատմական տները ցանկանում է ավերել եւ տալ TOKI շինարարական ընկերությանը: Ստորագրահավաքի մասնակիցները նպատակ ունեն հավաքելու 10 հազար էլեկտրոնային ստորագրություն: | 
