ՄԵԿ ՀԱՅ, ՄԵԿ ԹՈՒՐՔ, ՄԵԿ ԱԴՐԲԵՋԱՆՑԻ, ՖՐԱՆՍԻԱՑԻՆԵՐ, ԻՍՊԱՆԱՑԻՆԵՐ... Վ. Պ. ԵԽԽՎ երեկվա նստաշրջանում, որպես Նախարարների կոմիտեի նախագահություն ստանձնած երկրի արտգործնախարար, Էդվարդ Նալբանդյանը ներկայացրեց Հայաստանի նախագահության առաջնահերթությունները, որոնք «Ազգը» արդեն իսկ մանրամասն նշել է: 19 հերթագրված հարցերի զգալի մասն ընդհանրական էր, վերաբերում էր Եվրոպայի խորհրդի ընդհանուր դիրքորոշումներին: Կանխատեսելի մոտեցմամբ, ադրբեջանական ու թուրքական պատվիրակությունը հնարավոր առավելագույն պասիվությամբ էր ներգրավվել հարցերի ներկայացմանը` մեկական ներկայացուցչով սահմանափակվելով ինչպես Ադրբեջանի, այնպես էլ Թուրքիայի պարագայում: Հարցեր տվեցին մի քանի ֆրանսիացի, իսպանացի, բուլղար, լիտվացի պատգամավորներ: Այնքան հեշտ չէ նշել իրական պատճառները, թե ինչու էին մեր հարեւաններն այդքան պասիվ, սակայն ակնհայտորեն առնվազն երեք լեզուներով` ֆրանսերեն, անգլերեն եւ ռուսերեն հարցերին նույն լեզուներով պատասխան տվող Նալբանդյանի պարագայում ուղղակի դեմարշը ճիշտ ու տեղին բացատրություն չի լինի: Ինչեւէ, հետաքրքրական զուգադիպությամբ` Հայաստանից միայն մեկն էր իր հարցերը ներկայացրել` Լեւոն Զուրաբյանը մարտյան իրադարձությունների, «չազատականացված հեռուստատեսության», այլ հարցերով, որոնց Նալբանդյանը պատասխանեց` բավարարվելով հիշեցնել, որ մարտի 1-ի գործով քննությունը դեռ շարունակվում է: Էդվարդ Նալբանդյանը, ի շարս այլ հարցերի, նշեց, որ Վիլնյուսի Արեւելյան գործընկերության գագաթաժողովին դեռ ժամանակ շատ կա, ու Հայաստանի ներկայացուցչի հարցը կորոշվի մինչ այդ: Թուրք պատգամավոր Բուրհան Կայաթուրքի հարցին, թե ինչու ժամանակին Հայաստանի երկրորդ նախագահ Ռոբերտ Քոչարյանը հայտարարեց հայի եւ ադրբեջանցու «միասին ապրելու անհնարինության» մասին, Նալբանդյանը միայն հակադարձեց, որ երբ հարեւան երկրի առաջնորդը խոսում է «ողջ հայության թշնամի» լինելու մասին, ինչ հակազդեցություն կարող է լինել: Նույն` ղարաբաղյան համատեքստում հարցերից մեկին ի պատասխան Նալբանդյանը տեղեկացրեց, որ հունիսի 26-ին հանդիպելու է ԵԱՀԿ Մինսկի խմբի համանախագահների հետ, որոնք արդեն իսկ հանդիպել են Ադրբեջանի ԱԳ նախարար Էլմար Մամեդյարովին: Հայ-թուրքական հարթակում Նալբանդյանը ներկայացրեց, որ գնդակը, ինչպես գիտենք, Թուրքիայի դաշտում է, որը չի հետեւում դիվանագիտության կանոններին, քանի որ հետ կանգնեց արդեն իսկ ստորագրած արձանագրություններից` չվավերացնելով ու չիրականացնելով դրանք: |
